Diha pa sugta nga misurender na siya og panguyab

Kabaga gud nimo og nawong Igong, makapila ko na man ikaw ingna nga wa kay luna sa akong kasingkasing, aron ikaw akong higugmaon!” misinggaak sa tumang kalanog ang ganay sa tingog ni Imak nga nakamatngon nga diha na siya sa may balkon sa panimalay sa iyang hinalaran.

“Kagahi ba nimong sultihan ... nga gingil-aran gayod ako sa imong hitsura, nga lupig pay unggoy sa lasang nga nakabuhi?”

Tulin pa sa alas kuwatro nga nanaug si Igong sa may hagdanan. Ingon sa dili matugkad ang iyang tiil sa dili tiaw nga kahiubos. Usahay makamahay siya sa iyang mga ginikanan nga taudtaod na nga mitaliwan sa laing kalibutan kun ngano tuod nga naingon niini ang iyang panagway, nga lihayan sa mga dalaga ning ilang dapit sa may balangay sa Tinubdan diin sa kataas na karon sa iyang panuigon wa ug wa gayod siya makauyab?

Gani, sa tumang kamapahiubsanon ... makapila na kini niya sultihi si Imak, unsa ka dalisay ug katim-os sa iyang gugma ngadto sa maong babaye nga natingban niya sa tumang pagmahal.

Apan igo lamang siya tubagon ni Imak nga magkanayon: “Dili sad ko buang nga pagkababaye Igong, nga ikaw na lang ang akong daginuton sa pagpamana nga sa kapulihay mahimo akong kataw-anan!”

Ligid sa mga adlaw nanglabay. Bisan sa kahapdos sa kasingkasing ni Igong, ang paghikalimot ni Imak iya lang kining ginayanaya, ug nagpadayon sa pagbugwal sa iyang gibaol nga kabilin pa sa naanhing niyang amahan.

Hapon kadto, diin talisawop na ang adlaw. May nanangpit sa iyang ngalan ug sa iyang pagyanghag si Imak diay nga sa iyang tan-aw umaanak.

“Igong ... pasayloa intawon ako sa akong pagtamay sa imong pagkatawo!” miluom sa pagbakho si Imak.

“Kinsay amahan sa maong bata nga karon ikaw umaanak?” dihay pipila ka lusok sa luha nga nanglugmaw sa mata ni Igong.

“Biktima ako Igong sa mga pasalig ug bakak diin ako gipaangkan ni Bartolo nga usa diay ka lalaking minyo!” migakos og hugot kaayo si Imak sa hawak ni Igong.

“Ulahi na ang tanan Imak, nga ikaw nahigugma kanako?” luhaan ang mata ni Igong.

“Kay diha pa ako nimo sugta nga misurender na ako kanimo og panguyab!”

“Ug labaw sa tanan aduna na akoy asawa nga makamao nga momahal kanako!” (Kataposan)