Man Hater

Gula 119

“Adto na ako, Salie. Di ko buot nga mag-abot kami si Yuri dinhi. Sakitan ako nga magtan-aw ninyo. Ang inyong kalipay maoy akong kasakit ug nagkawot sa akong lubnganan.”

Wala kapugngi ni Salie ang paglakaw ni Allan. Nasabtan niya nga gisakitan gayod pag-ayo ang ulitawo. Apan wala siya’y mahimo kay usa ray iyang gugma ug kini gikatugyan na niya ngadto kang Yuri.

Daghan na ang mga gutlo nga milabay sukad sa paglakaw ni Allan. Si Salie maorag gilansang sa iyang gibarogan. Giganoy ang iyang hunahuna sa halawom nga pagpalandong. Gihinuktokan niya ang gisulti ni Allan.

Gimahal gayod kaha siya ni Yuri? O usa lang siya sa daghang mga babaye nga gipasaligan nga pakaslan niini? Nanuykahaw kining mga pangutana sa lawak sa iyang hunahuna.

Apan kun hunahunaon, sayo pa kaayo aron maghunahuna siya og negatibo. Mao pay pagtunod sa adlaw sa kasadpan. Ug sa gabii pa ang ilang sabot nga mamalaye ang lalaki kaniya.

Sobra lang ako ka-excited, gialam-alaman niya ang iyang kaugalingon. Medyo  nahupay ang iyang gibati. Nakuhaan og diyotay ang iyang kabalaka.

Gipaabot gayod niya ang pagtawag ni Yuri sa telepono. Gisulayan na usab niya ang pagtawag niini sa headquarters apan wala kini didto. Wala’y nasayod sa mga kauban ni Yuri kun hain mopaingon ang ulitawo ug wala usab masayri kun unsang orasa kini mobalik sa presinto.

Miabot ang ikaunom nga takna sa kahaponon. Wala gihapon muabot ang tawag ni Yuri. Gipahimutang na ni Salie ang mga pagkaon sa lamesa. Gisunod niya ang pag-areglar sa iyang kaugalingon. Usa ka kaswal nga bestidang asul ang iyang gisul-ob. Nanghidhid siya’g diyotay’ng patahom. Gipadunghay niya ang tag-as niyang buhok. -- Sumpayan pa