Mata sa Kasingkasing

Gula 123

“Maayo kay mianhi ka gyud sa ospital ug nahimamat ka namo,” nagkanayon ang amahan ni Robert. “Nalipay mi nga nahimamat ka na gyud namo.”

“Kanunay kang hisgotan sa among anak,” gikan sa inahan ni Robert. “All praises siya nimo. Buotan ka kuno kaniya.”

Igo lang mipahiyom si Angeline sa iyang nadungog.

Nakahukom si Angeline nga dili na lang siya motambong sa iyang mga klase nianang adlawa. Hulaton niya ang resulta sa pag-atiman sa mga doktor kang Robert. Nakig-bonding siya sa mga ginikanan ug igsuon ni Robert.

Dihang naudto, migawas na ang doktor nga nag-atiman kang Robert. Nalipay sila kay gitug-an sa doktor nga luwas na si Robert sa makuyaw nga kahimtang. Si Angeline ingon sa naibtan og tunok. Apan dili pa puydeng pakigsultihan ang pasyente. Nagkinahanglan pa kini’g igong pahulay.

Pagkaugma sa buntag, gitugotan na sa mga doktor ang mga tagtungod nga makigsulti kang Robert. Lakip usab si Angeline.

“M-maayo kay nia ka,” bisan luya pa apan nagpahiyom si Robert nga nakakita kang Angeline nga nag-apong niini. -- Sumpayan pa