Batang linti si Sebyo

Agay, kasakit sa akong nawong!!! Nganong gitamparos mo man ako? Unsa may akong sala, pangutana intawon ni Arthur nga nagping-it sa hilabihang kasakit nga mora’g nakakita’g aninipot niadtong higayona. Nakapanglingo-lingo si Sebyo ning kahaponon samtang naglantaw siya sa mga batan-on nga nagkalingaw og inom sa usa ka galong tuba sa tindahan ni Inse Basing.

Mao kining kasinatian samtang tin-edyer pa siya kaniadto ug hayskol siya sa USP Mabini Unit, siyudad sa Sugbo.

Ug naghanduraw siya niini gumikan sa mga batan-on nga makita niya atbang sa ilang bentana.

Masuko si Sebyo kaniadtong kun dunay motutok-tutok niya.

Siya ang giilang batang linti sa ilhang dapit ug sa ilahang eskuylahan usab.

Gani, makadaghan na siyang nakasulay og suspenso sa ilang eskuylahan gumikan sa “drunkenness during classes, extortion ug hooliganism,” kon pagpanghagis.

Sugoon ni Sebyo kaniadto ang iyang mga bata-bata sa pagpangilkil og salapi sa mga tawong lumalabay sa ilang estambayanan para inom og Anejo Rhum ug palit og plaka sa kanta nga patokar-tokaron niya sa ilang “radio-phono” sa balay.

Mangulata, manamparos ug magkalisod manunggab pa gyud kun dili na makapugong si Sebyo sa iyang kapungot ug kasuko kun dili matuman ang iyang gusto.

Dihay usa ka higayon, nakulatahan niya ang anak sa usa ka polis.

Nadakpan si Sebyo ug gidala sa patrol car ngadto sa Ramos Police Station kaniadto.

“Pastilan nimo Sebyo, nakabayad hinuon ta og singkuwenta pesos sa imong binuang”, langgis nga tingog sa iyang inahan nga si Mama Rosa niya.

Dako na ang singkuwenta pesos kaniadto. Karong panahona, Ninoy Aquino kon kinyentos pesos ang katugbang niana.

“Kun dili ka na magtinarong, hayan mapareha kani Jaime Jose nga gipaig sa silya elektrika”, pahimangno pa sa iyang inahan samtang nagdigamo sa ilang paniudto.

Mao kining mga eksenaha nga manumbalay sa pangisipan ni Sebyo karong hapona.

Mosaysenta anyos na ang iyang pangedaron. Luya na ang iyang mga lutahan ug tuhod, dili na sama kaniadto.

May rayuma kon “arthritis” na siya ug “diabetes” pa gyud.

May mga apo na si Sebyo.

Igo na lang siya sa paghandum ug paghanduraw samtang batan-on pa ang iyang edad!Maapsan gyud ang edad sa tawo sa dagan sa atong panahon matag karon ug unya bisan og unsa pay kahimtang ug ranggo nimo dinhi sa kalibutan. (Kataposan)