Man hater

“Di ko magdugay. Naghatod lang ko niining special assignment nga gihatag ni Sir kanimo.” Ug gitunol sa lalaki ang gikuptang papel ngadto sa dalaga.

“Salamat,” gidawat ni Salie ang papel ug daklit nga gitamdan.

Pagyanghag sa dalaga, iyang naabtan si Allan nga nagtutok kaniya. Maukobon kaayo ang tinan-awan sa ulitawo ngadto kaniya.

“Allan, nganong ingon niana ang tinan-awan mo kanako?”

“Matud mo, pamay-an ka karon ni Yuri? Wa pa man lagi siya? Hapon na, o.”

“Nia na kadto sila karong taudtaod.”

“Tingalig gibinuangan ka lang niya?”

“U-unsa?”

“Magsusuwat ka, Salie. Usa ka reporter sa inilang mantalaan dinhi sa dakbayan. Ug tingali wala malilong kanimo ang kamatuoran nga anaa sa mga polis ang daghang mga kabuang?”

“Dili tanang polis ang nagbinuang sa ilang katungdanan, Allan.”

“Tinuod kana. Apan sa kadukirok sa babaye, dili kaha nga silang tanan managsama’g abilidad?”

“Ayaw dauta ang pagkatawo ni Yuri kay lahi siya sa uban.”

“Wa ko magdaot ni bisan kinsa. Gisulti ko lang ang ania sa akong hunahuna ug ikaw ray nag-ingon kaniadto nga wala’y mapili sa mga lalaki, di ba? Unya karon moingon ka nga lahi si Yuri?”

Wala makatingog si Salie. Miduko siya.

“Natahap ako, Salie,” ni Allan.

“Nga unsa?” gitutokan niya ang ulitawo.

Nga giboladahan ka lang niadtong polisa. Gipadako lang niya ang imong ulo.” -- Sumpayan pa