Kalampusan luyo sa mga pag-antos

Paningkamot gyud Simo sa imong pag-eskuwela, ayaw’g apil-apil anang bugoy-bugoy labi na gyud nang suyop ug shabu,” pahimangno nga dalang tambag ni Tikya ngadto sa kamaguwangang anak samtang nag lung-ag og saging ug kamote aron isuroy sa ilang dapit.

Duha ka buok anak niya kang Dolpo nga taud-taud nang mitaliwan ngadto sa laing kalibutan gumikan sa sakit nga pasmo ug nerbiyos sa kalawasan niini, pun-an pa sa bisyong inom sa Tanduay 65 bisan og wala pay sulod ang tiyan sa sayong kabuntagon.

“Wala Nay uy, magtinarong ko sa akong pagtungha bisan og gagmay ko’g grado basta pasado lang,” tubag pa ni Simo ngadto sa iyang inahan nga magkapuliki og huyop sa ilang abuhan nga tulo ka mga dagkung bato ang sug-ang.

Hapit na matapos si Simo sa hayskol sa eskwelahan sa ilang lungsod.

Kun wala siya’y klase, makasapi siya og ginagmay pinaagi sa pagpanghugas og mga sakyanan kun “carwash.”

Iyang manghod si Boy nga singko anyos pa ang edad. Pila’y estorya, nakagraduwar gyud si Simo sa hayskol.

“Simo, pordoy kita ug wala kitay ikasarang sa paggasto kanimo sa kolehiyo. Husto na seguro ang imong grado nga nakab-ot,” pamahayag sa iyang inahan usa ka higayon niana nga bag-ohay pa silang nakapanihapon.

“Sige lang Nay, mag-working student lang ko para libre ko sa tuition fee sa kolehiyo,” tubag ni Simo.

Tuod man, nadawat siya isip usa ka working student sa eskuwelahan sa kolehiyo sa ilang lungsod.

Accountancy ang kursong iyang gikuha kay arang-arang man siya sa math ug arithmetic.

Na-assign siya sa library ug kun dili “busy”, makalugar gyud siya og basa sa ilang mga textbooks.

Dali rang panahon nga miligid. Nakatapos gyud si Simo sa Accountancy.

Kumo kay anhi ra man sa Sugbo ang “board exam,” misulay si Simo og kuha og board, kon eksamin basin na lang kun makataghap.

Gibuligan gyud siya sa kapalaran kay sa pag-“release na sa resulta, usa siya sa nakapasar.

Certified Public Accountant kon CPA na si Simo. Milugmaw ang mga luha sa kalipay ni Simo ug ni Nanay Tikya niya sa ilang mga kaapingan.

Nakasulod dayon siya og trabaho sa usa ka dakung kompaniya diin dako sab ang suweldo.

Nahaw-as na sila si Simo sa pagka-pordoy ug sa hilabihang pagka-rabanit sama sa usa ka ilagang pawot.

Busa, tinuod gayud diay nga magpahipi ang kalampusan luyo sa dag-om sa mga pag-antos ug kasakitan! (Kataposan)