Man Hater

Gula 116

Nanlimbawot ang mga balhibo ni Salie nga nagpalandong sa nahitabo nilang  Yuri. Gipangilogan siya. Naulaw siya sa iyang kaugalingon nga mitahan sa tanan sa dakong kasayon ngadto sa lalaki bisan dili pa sila magtiayon. Karon lang niya natugkad nga alkanse gayod ang babaye nga motugyan sa iyang pagka-babaye ngadto sa lalaki kun wala pay kasal.

Kun simbako dili motuman si Yuri sa ilang gikasabotan ug molikay kini sa kaakohan ngadto kaniya, unsay iyang buhaton? Taposon ba niya ang kaugalingong kinabuhi sama sa gibuhat sa iyang inahan ug igsuon?

Dili! Misinggit ang iyang kahiladman. Dili siya hungog nga hunoson ang kaugalingong kinabuhi tungod lang sa usa ka lalaki. Kun mahitabo man nga binuangan siya ni Yuri, kasilagan gayod niya kini sa tibuok niyang kinabuhi.

Mikilab ang mga gutlo. Dihay sakyanan nga mihunong tungod sa gate nga puthaw. Kalit misanag ang bayhon ni Salie. Mora’g migaan sa iyang paminaw ang iyang kalawasan. Nagtuo siya nga si Yuri na ang nahiabot kuyog sa iyang mga ginikanan.

Lagsik ang mga lakang sa dalaga nga mipaingon sa pultahan ug iyang giablihan. Apan nahisagmuyo siya sa pagkakita sa lalaki nga mao pay pagkanaog sa sakyanan. Dili si Yuri ang nahiabot.

Si Allan!

Nabawo si Salie. Ang landong sa kasubo mitaob sa iyang nawong. Mora’g naluya siya.

Si Allan mihinay pagduol sa dalaga nga nagbarog sa baba sa pultahan. “Maayong hapon,” nangatahoran ang ulitawo.

Mitando si Salie agi’g balos sa pangatahoran ni Allan. “Dayon, Al,”

“Ayaw na lang,” mibalibad ang ulitawo. May gikuot kini gikan sa iyang bolsa sa iyang polong asul. -- Sumpayan pa