Mata sa Kasingkasing

Gula 120

Human sa pamahaw si Angeline misulod sa lawak ug nag-ilis sa iyang uniporme nga pangtungha. Samtang si Vera maoy nanghugas sa ilang kinan-an.

Sayong mibiya si Angeline sa ilang boarding house paingon sa tulonghaan. Naglakaw lang siya. Pagliko niya sa usa ka eskina nalantawan niya didto sa unahan ang daghang mga tawo nga nagpunsisok tungod sa usa ka bilding. Mora’g dunay ilang gikagubtan.

Naikag si Angeline sa pagpakigsusi. Mao nga dihang naduol na siya sa nagpunsisok nga mga tawo, nanguryoso siya. Nakita niya nga dihay taga media ug mga polis sa homicide. Iyang nasayran nga may tawo diay nga gipatay sulod sa motel nga kasamtangan pang giugkat sa taga SOCO.

Gi-interview sa taga media ang kapolisan. Sumala sa kapolisan, ang biktima nailhan lang sa ngalan nga Roger Alicer. Wala pay matumbok nga suspek sa kamatayon niini tungod kay matud pa sa mga crew sa motel mi-check in kini kagabii nga nag-inusara. Pagkabuntag, nakaplagan na lang kini sa roomboy nga patay na ug may mga samad pinusilan. Posibleng gibutangan og silencer ang armas nga gigamit sa suspek pagpatay sa biktima kay wala may nabating buto ang mga crew sa motel. -- Sumpayan pa