Ang baligya ni Berit

Igo lang nakatungtong si Berit sa kolehiyo dihang namatay ang iyang amahan nga usa ka panday. Wala na siya makapadayon pagtungha. Siya na maoy miatiman sa iyang inahan nga may diperensiya ang panan-aw. Ug maoy gisaligan nilang inahan ug anak ang panginabuhi nga pagpamaligya og bibingka sa Carbon.

“Bibingka mo diha, Sir,” matud na usab ni Berit aron pagdani sa mga pumapalit. “Lami kaayo.”

“Tagpila man ni, Day?” usa ka lalaki ang miduol ug nangutana.

“Tag P5.00, Sir,” tubag ni Berit.

Mipalit ang lalaki og napulo ka buok bibingka. Tibuok usa ka gatos ka pesos ang kuwarta niini nga gitunol kang Berit.

“Imo na kanang sukli,” nagkanayon ang lalaki. “Basta sukad karon suki na ta. Okey?”

“Okey, Sir,” ni Berit.

Ug nag-ila-ila sila. Alessandro diay ang ngalan sa lalaki.

Nianang pagkaugma mipalit na usab si Alessandro og bibingka kang Berit. Ug kadto nasundan pa sa daghang mga higayon nga mipalit si Alessandro sa baligyang bibingka sa dalaga.

Hangtud nga usa ka hapon niana midapit si Alessandro kang Berit nga mangaon sa gawas. Wala siya makabalibad sa lakaki. Sayo siyang nanghipos sa iyang tinda ug misanong sa pagdapit ni Alessandro. Nangaon sila sulod sa usa ka mahalon nga restaurant.

“Dili kaha masuko ang imong asawa niining imong gibuhat, Alessandro?”

“Asawa god,” ni Alessandro. “Ulitawo pa ko, uy. In fact, nagpangita pa ko karon sa akong ideal woman.”

Ug nakahigayon na hinuon si Alessandro sa pagpangulitawo kaniya. Nakalitan si Berit. Apan kadali ra siyang nakapamalibad.

“Hatagi una kog panahon sa pagtimbangtimbang niana, Alessandro,” ni Berit pa.

“Okey,” ni Alessandro. “I can wait.”

Paglabay sa duha ka semana, gidawat na ni Berit ang gugma ni Alessandro. Malipayon sila sa ilang relasyon.

Hangtud nga usa ka Domingo niana sa ilang pagpanuroy, wala siya makatutol dihang gidala siya ni Alessandro sulod sa usa ka mabugnawong lawak sa hotel. Didto gikatugyan ni Berit kang Alessandro ang iyang kaputli.

“Magpakasal na ta, Berit,” nagkanayon si Alessandro tapos huwasi sa kakutas sa ilang kombate.

“Imo kong pakaslan?” ni Berit.

“Yes,” matud ni Alessandro.

Sa dihang nag-ilis na si Alessandro aron manggawas na sila sa hotel gihawiran kini ni Berit.

“Sultihi kos tinuod, Alessandro,” ni Berit pa. “Pila na ka babaye ang imong nadala dinhing dapita?”

Miligdong ang nawong ni Alessandro. “Tinuod nga daghan nang mga babaye nga nadala nako dinhi apan ikaw lang ang akong gihagad nga pakaslan.”

“Ngano man?”

“Tungod kay ikaw lang ang nasuta ko nga virgin pa. Dili pan-os ang imong bibingka. He-he!”

“Kun mao, kutob ra diay sa virginity ang imong gugma sa babaye?

“Dili baya. Pero ang virginity sa usa ka babaye maoy usa sa akong sukdanan sa usa ka babaye nga kasaligan. Misaad ko sa akong kaugalingon nga dili gyod ko mangasawa og babaye nga dili na birhen.

Nahatalonong si Berit sa gisulti ni Alessandro. (Kataposan)