Jealous Guy - Gula 3

May nakita si Emil nga batan-on ug gwapa nga babaye nga diha magluhod atubangan gayud sa altar. Sigurado si Emil nga siya si Shirley, ang asawa sa namatay.

Nagpatoo si Emil nga tinuod siya nga misabat sa pangadye bisan og ang tinuod niya nga tumong mao ang pagpangita’g higayon nga masuod niya ang batan-ong byuda.

“Maayong gabii, maayong gabii...” nagtinan-away ang mga mitambong sa pangadye, apil na si Shirley. Mitutok si Shirley kang Emil nga nagpahiyom ngadto sa mga kauban niya nga misabat sa pangadye.

“Condolence Shirley...higala nako si Marlon kay nagkaila kami didto sa usa ka videokehan sa Manalili. May kauban namo nga mitaho nako nga patay na si Marlon mao nga nangita ko’g paagi nga matultolan ang inyong balay,” ni Emil pa.

Mipahiyom si Shirley. “Ikaw diay ang giingon ni Marlon nga sagad niya ikadungan og kanta sa videokehan?” matud ni Shirley. Mora’g natukma usab ang pasumangil ni Emil nga sa videokehan sila nagkita og si Marlon sa buhi pa.

Gidalitan ni Shirley og makaon ug mainom si Emil. Nagdungan sila pag-snack human sa pangadye. Nagsultihanay silang duha kay gibiyaan man sila sa ubang nanabat sa pangadye.

“Unya, unsay plano nimo Shir karong patay na si Marlon?” gisukna ni Emil ang byuda. Wala dayon motubag si Shirley. Nagpitok-pitok ang mga mata sa byuda. “Mao kana ang akong nabalak-an kay gamay pa raba ang bugtong namo nga anak.”

Walay trabaho si Shirley kay nag-atiman ra man kini sa iyang anak dihang buhi pa si Marlon. “Mahimo ko ikaw nga tabangan aron makakita og trabaho Shir. Suwayan nato og hangyo si Mayor Mike nga makatrabaho ka sa City Hall,” ni Emil.

Nalipay kaayo si Shirley nga nakadungog nga tabangan siya ni Emil nga makakita’g trabaho.

“Ayaw kabalaka Shir, duola lang ko kun magkinahanglan ka sa akong tabang,” giingnan ni Emil ang gwapa nga byuda dungan sa pagtunol niya sa iyang calling card.

Mao pa gani ang una nila nga panagkita, apan nasuod na dayon ni Emil si Shirley. “Unya dili lang ko magdugay Shir ha, mobalik ra unya ko,” nananghid si Emil kang Shirley nga mopauli na.

Gihatud siya sa byuda didto sa nahimutangan sa iyang motorsiklo. Nakita ni Emil ang tam-is nga pahiyom nga gibuhian ni Shirley dihang gipislit niya ang kamot niini. “Bye Shir, see you next time.” (Sumpayan)