Nasira

Dear Tita Salie,

Maayong adlaw. Ako si Rain, 20 anyos, ulitawo pa ug dunay uyab kanunay gyod ko nga mobasa og Banat News kay makalingaw gyod pag-ayo ang sulod niini. Unya daghan pod ko og makat-onan sa imong column ang pasabta.

Nagproblema gyod ko karon mahitungod sa akong kaugalingon, Tita. Ug wala gyod koy nakitang tawo nga puyde nako sultihan niining akong suliran. Tungod kay maulaw ko ug mahadlok usab ako nga ilang masayran.

Ka usa nikuyog ko sa akong mga barkada ug nakahukom mi nga mogamit og babaye. Apan human sa maong hitabo duna koy namatikdan sa akong kinatawo nga mora og katolkatol ug mogilok usahay ang sulod sa tubo. Ako lang kining gipanid-an hangtod nga dunay molama sa akong brief nga mora’g nana. Ug niabot gyod ang panahon nga sakitan nako mangihi. Sakit gyod kaayo mao nga putolputol gyod kun mangihi ko nay usahay dili man nako maagwanta ang kasakit ug akong undangon.

Unsa man kining nahitabo nako, Tita, mao ba kini ang ilang giingon nga nasira? Kun nasira ko kun may tambal nga akong imnon aron maayo nako niining sakita? Kun makig-sex ko sa akong uyab matakdan ba usab ang akong uyab sa akong sakit? Unsa may akong buhaton? Palihog pasabta ko. Daghang salamat sa imong pagtagad.

-- Rain

* * *

Maayong adlaw. Nasayod ko kun unsay tambal sa tawo nga nasira. Kun tabletas nga imnon ang buot nimong ipasabot nasayod ko niini ug nasayod usab ako nga may pagkamahal kini. Busa dako ka gyod og gasto kun gusto nimo nga mamaayo. Apan pasayloa ko nga dili ko makahatag kanimo sa pangalan sa maong tambal kay wala koy katungod nga mobuhat niini.

Aron makaseguro ka sa imong kahimtang karon mas makaayo kanimo kun moduol ka og doctor aron ka ma-chek up ug masayran gyod kun nasira ka, unsa nga virus ang niatake kanimo ug mahatagan ka sa hustong tambal alang sa imong kaayohan.

Ug palihog, kun kanunay na inyong gibuhat ang premarital sex, karon nga duna ka pay gipamati sa imong lawas ayaw gyod pagpakig-sex sa imong uyab kay mosamot gyod kadako ang imong problema. Ug dili lang ikaw ang may problema kun dili kamo nang duha kay segurado ko nga matakdan gyod siya sa imong sakit. Ug lisod na kaayo kun matakdan siya kay dali na lang kining motukar kaniya ang maong sakit kay lisod patyon ang virus nga nagdala niini.

-- Tita Salie