Mata sa Kasingkasing

Gula 115

Ikaw diay? Wa ka ba diay magmalipayon sa relasyon ninyo ni Almina?”

“Di mahitabong magmalipayon ko sa among relasyon. Alang nako, usa ka hikog ang pagpakigrelasyon kaniya.”

“Nganong nakasulti ka man og ingon niana?”

“Nagmahay ko kun nganong miabot si Almina sa akong kinabuhi.”

Si Erik mipasabot kang Angeline nganong dili siya malipayon sa relasyon nila ni Almina. Ang lintunganay’ng hinungdan mao nga wala gayod siya mobati’g paghigugma ngadto kang Almina.

Gitun-an unta ni Erik ang iyang kaugalingon sa paghigugma kang Almina. Apan ang salawayong kinaiya niini naka-turn off kaniya. Bastos nga pagka-babaye si Almina. Selosa nga wala sa lugar.

“Kun di pa tungod nimo di man unta ko mangulitawo ni Almina,” nagkanayon si Erik. “Di lang ko gustong sigehan ka niya’g samok. Ingon ko niana kun makighigala, andam magsakripisyo.”

“Mora man og ako’y gibasol nimo sa nahitabo sa imong pagpakigrelasyon kang Almina karon,” ni Angeline. -- Sumpayan pa