Jealous Guy

Nagpaingon sa downtown area si Emil usa ka Domingo niana. Samtang nag-drive siya sa iyang motorsiklo, nalabyan niya didto sa Labangon ang daghang tawo nga naghatod og minatay paingon sa menteryo.

Ikatulo na kini nga patay nga iyang naagian didto sa Labangon nga paingon sa menteryo. Basi gud diay sa rekord sa City Hall, dunay labing minus 14 ka tawo ang mamatay matag adlaw dinhi sa dakbayan sa Sugbo.

Sagad gayud nga ang patay itumong gayud paglubong sa adlaw’ng Domingo aron daghan sa mga higala sa namatay ang makahatod kaniya sa katapusang pahuwayan.

Dili kaayo daghan ang mihatod sa minatay paingon sa menteryo. Nasabtan ni Emil nga tingali batan-on pa ang namatay kay wala pa kaayo’y daghang mga barkada o mga higala.

Agi og respito, gipaaginod lang ni Emil ang iyang motor dihang duol na siya sa porlon nga gikargahan sa patay. Mitingkag ang iyang dunggan pagkadungog sa tukar nga gipatugtog sa porlon.

“I was dreaming of the past, and my heart was beating fast, I began to loose control, I began to loose control.”

Wala makapugong si Emil sa pagpahinay pagsamot sa dagan sa iyang motor. Giamparan niya ang porlon ug nasuta gayud niya nga “Jealous Guy” ang tukar nga gipatugtog.

Mipadaplin si Emil ug nanaug siya sa motorsiklo nga iyang gisakyan. Gitan-aw niya ang mga tawo nga nagsunod sa porlon. Usa ka tanod nga gipangutana ni Emil kun ngano nga ingon niadto man ang tukar nga gipatugtog sa porlon.

“Theme song man gud na nila sa namatay ug sa iyang asawa, kanang nagsunod sa porlon nga nagduko,” matud sa tanod nga mitudlo sa batan-ong babaye nga nasabot ni Emil nagbakho sa paghinilak.

Giguyod na lang ni Emil ang iyang motorsiklo ug nagsultihanay sila og ang tanod. Diha niya masayri nga nadam-agan sa sakyanan ang maong tawo ug wala mo-surrender ang nakadam-ag.

Gipasiklapan ni Emil ang asawa sa namatay. Nasuta niya nga batan-on pa gayud kaayo, tingali nagpangedaron pa kini og 20-anyos. “Anugon kaayo ning tawhana nga namatay kay bag-o pa gani kini nga nakahuman sa pag-eskwela pagka abogado.

“Asa dapit ang balay sa namatay Brod?” gipangutana ni Emil ang tanod. Human siya tug-ani sa tanod, gibalikan niya pagpasiklap ang asawa sa namatay ug dayon mipadagan sa iyang motor.

Pagka-gabii, gipangita ni Emil ang balay sa namatyan. (Sumpayan)