Man Hater

Gula 109

“Kinsa man kaha kadto?” matud ni Salie nga misunod diay kaniya.

Mikunot ang agtang ni Yuri nga miatubang kaniya. Wala’y gikatubag. Gigunitan sa ulitawo ang iyang bukton ug gidala siya pasulod sa pultahan. Gipauna siya niini pagsulod sa balay kay gitrangkahan una sa ulitawo ang gate.

Pagsulod nila sa balay, dihadiha giserad-an ni Yuri ang tanang bentana ug ang pultahan. Si Salie wala mahimutang. Ang iyang hunahuna didto ra sa ulitawo nga nanuop kanila.

“Dili ko ikaw biyaan karon,” matud ni Yuri. “Tingalig mobalik kadtong tawo ug wala’y makatabang kanimo.”

“A-anhi ka matulog?” dihay laing gikabalak-an ang dalaga.

Gitan-aw siya ni Yuri. Gihulbot niini ang .45 kalibre nga gisuksok sa may hawakan ug giseguro nga aduna kini mga bala una ibalik pagsuksok. “Dili ko matulog. Magbantay ko nimo.”

“A-apan...”

“Nasayod ko kun unsay anaa sa imong hunahuna. Ayaw kabalaka kay di ka maunsa.”

“Di na kinahanglang imo pa kong bantayan. Makahimo ako pagpanalipod sa akong kaugalingon.”

“Dili mahimo. Bahala’g masuko ka, basta kay di ko ikaw biyaan. Klaro kaayo nga may daotang tuyo kadtong tawhana kanimo.”

Nakita ni Salie nga dili na mausab ang hunahuna ni Yuri. Napugos na lang siya sa pag-uyon. “A-ang ako lang...nga di na kinahanglan nga mag-over react ka pa.”

“Pasagdi lang ko. Ako kining gusto. Kun katulgon ka na, sulod lang sa imong kuwarto ug panerado.”

Milingkod na lang si Salie sa sopa ug wala magtingog. Mitupad kaniya si Yuri. Gipasagdan niya kini nga mihakgom sa iyang kamot ug gihagkan. Milingiw siya kay dili niya buot makita ang daw nagpamulong nga mga mata sa hinigugma. Romantiko kaayo ang ulitawo. -- Sumpayan pa