Human sa Kalipay

Gula 7

“Unsa? makasab-an g’yud ko ana ni Mama nako Frank kun ugma pa kita mamauli,” may kabalaka ang tingog ni Rosita. Giam-aman ni Frank ang dalaga pinaagi sa pagparayeg na usab kaniya.

Sa ikaduhang higayon, may nahitabo na usab kanila sulod sa cottage. Ingon sa ganado kaayo si Frank. Nanggawas sila sa cottage ug miduol sa mga barkada ni Frank nga nag-alirong sa gihimo nila nga daub.

Nakita ni Rosita nga naghung-hongay si Frank ug ang iyang mga higala. Mipahiyom ang duha niini ka higala nga mga lalaki ug mitutok kang Rosita. Nakasabot si Rosita nga siya ang gipanagsultihan nila ni Frank.

Nahigala ni Rosita ang babaye nga girlfriend sa usa ka barkada ni Frank. “Day ayaw kaayo’g kompyansa nianang Frank ha kay palakero kaayo. Duna na kana’y asawa day,” hagawhaw sa babaye kang Rosita.

Napasiga ang mga mata ni Rosita nga nakadungog sa gisulti kaniya sa babaye. “Wala ka magkomedya day?” gisuna ni Rosita ang babaye. “Gisultihan ko ikaw kay gitug-anan ko sa akong boyfriend nga may dautang plano nimo si Frank.”

Gitawag ni Rosita si Frank. Iya kining gisukmatan nga usa man diay siya ka dakung minyo. “Sagdi lang gud og minyo ko Rose, dili bitaw tika pasagdan sa imong panginahanglan,” ni Frank pa nga nagpahiyom.

Buntag na gayud sila nga mipauli. Gikasab-an pag-ayo si Rosita sa iyang inahan. Misamot ang kaguol ni Rosita kay dihang gikontak niya si Frank pinaagi sa text, wala gayud kini motubag.

Gisuwayan niya’g kontak ang numero niini apan dili usab makontak. Wala na gayud mokontak pa kaniya si Frank. Milabay ang duha ka buwan, nagsabak si Rosita.

Giyawaan ang iyang huna-huna. Nagplano siya’g panimalos. Usa ka hapon, giduaw siya ni Frank sa iyang gitrabahoan. Gipahimuslan ni Rosita ang higayon.

“Frank, maayo kay dia ka. Gimingaw na kaayo ko nimo, makigpanuroy ko nimo inig-out nako,” giingnan niya si Frank. Nagngisi si Frank nga mitangdo. “Sigi balikon tika.”

Gidala gayud ni Frank si Rosita sa motel. Dihang didto na sila sa sulod gikuot ni Rosita sa bag ang giandam na niyang kutsilyo ug gihansakan si Frank sa makadaghan nga higayon.

“Nakabawos na gayud ko nimo Frank. Nalipay ka sa hamubo nga higayon apan antosa ang kasakit sa akong panimalos,” misinggit si Rosita sa dayon niyang hansak sa kutsilyo sa pugaran ni Frank.

Kalit nga naputol ang paghanduraw ni Rosita dihang giduol siya sa kauban niyang piniriso. “Matulog na ta day, ayaw na paghinuktok diha.” (Kataposan)