Mata sa Kasingkasing

Gula 113

“Kumosta ka na?” Gipangutana ni Angeline si Erik dihang iyang namatikdan nga mora’g masulob-on ang nawong niini.

“Okey lang,” mubong tubag ni Erik.

“Dinhi ka man kuno kaganina?”

“Oo. Pero wa ka man dinhi. Nanimba man kuno mo ni Robert.”

“Unsa man diay imong tuyo?”

Imbes motubag, nanghupaw hinuon si Erik. Ug misamot paglamugdong ang nawong niini.

Nakasabot si Angeline nga may problema si Erik maong iya kining gisukitsukit. Si Erik mitug-an kaniya sa dako niining problema.

“Mabdos si Almina,” padayag ni Erik ngadto kang Angeline.

“U-unsa?” Nakugang si Angeline.

“Mao kini dako kong problema karon. Gusto ni Almina nga akong bangonon ang iyang kadungganan.”

“Mao gyud kana ang angay mong buhaton, Erik.”

“Pero dili pa ko andam magminyo. Gusto kong makatapos una sa akong pagtuon. Seguradong masuko ang akong parents kun masayod sila nga nakadisgrasya ko’g babaye.” -- Sumpayan pa