Addict si Dodong

Dear Tita Salie,

Good day to you. Just call me Inday ug bag-o lang ko ni graduate sa high school. Nagpangedaron na ko og 16 years old.

Duna koy boyfriend, just call him Dodong, 18 years old na siya apan first year high school lang gihapon siya hangtod karon. Unsaon man gud nga bugoy-bugoy man sad siya. Sige’g undang og eskuyla ug balik na pud siya unya undang na sad.

Sa tinuod lang bisyoso siya ug addict pa gyud. Isugon nga tawo sa among dapit ug ilado kaayo. Mauwaw bitaw ko usahay kay maapil man ko og kasikat kay daghan man siya’g kaila.

Dili gayod ganahan ang akong pamilya kaniya tungod sa iyang lifestyle. Dili usab boto kaniya ang akong mga ka-berks. Gusto nila nga akong buwagan ang akong bf nga si Dodong apan maglisod gayod ko og buwag, Tita kay love gayod kaayo nako siya ug ako na usab nga nahatag kaniya ang akong pagkababaye. Mao nga masayangan ko sa among relasyon kay hapit na baya mi mag-usa ka tuig. Unsa may akong buhaton, Tita? Palihog pasabta ko ug tabangi ko kun unsaon ko kini. Daghang salamat and more power. -- Inday

* * *

Hello, Inday ug maayong adlaw kanimo. Ug congratulation! I am pretty sure nga malipayon gayod ang imong pamilya kay migradwar ka man sa high school. Manghinaut ko nga makapadayon ka sa pagtungha sa college. Lisod ang pag-eskuyla karon tungod sa kamahal sa balayranan apan pangita og paagi. Puyde kang mag-scholar mangita ka sa mga scholar o mag-working o self-supporting student just in case moatras ang imong parents sa pagpa-eskuyla kanimo. Labaw nga malipayon gayod sila kun imong planuhon ang imong kinabuhi. Ayaw usiki ang panahon kay bata ka pa kaayo. Lantawa ang imong kaugmaon aron dili ka maglisod sa imo unyang kinabuhi.

Kun ingon niana imong matang sa kinabuhi nga gipuy-an karon, of course, maanugnan gayod ang imong pamilya, mga higala ug ako sa imong kinabuhi. Bata pa kaayo ka daghan ang muabot sa imong kapalaran. Dili gayod maayo kanang lalakiha kay addict man. Kun dili siya mag-usab basin siya ang magtulak kanimo sa dautan.

Busa, ayaw panghinayangi ang inyong relasyon nga mawala. Ayaw na panghinayangi ang imong pagkababaye nga imong nahatag nianang imong bf. Dili na nato mabalik ang niagi ug nahuman na. Maoy panghinayangi ang imong kinabuhi, kun kini maguba tungod sa imong wala’y pagpakabana.— Tita Salie