Man Hater

Gula 107

“Unsay ikasulti mo niining hitaboa karon, Yuri?” nangutana si Salie dihang lain na ang gibalita sa TV. “Human na kaha ang kaso?”

“Di kita makatumbok nga siya gayod ang kriminal, Salie,” tul-id nga tubag ni Yuri.

“Apan miangkon siya?” ni Salie.

“Usa ka buang si Lito Galacia,” mipasabot si Yuri. “Posible nga giangkon niya kini aron adunay ikasulti. Ang buang wala sa hustong panghunahuna.”

Nahilom si Salie. Natugkad niya ang gisulti ni Yuri.

“Ugma puhon pakigkitaan ko si Vicky,” matud na usab ni Yuri. “Makatabang siya pag-ila sa nagpatay ni Debbie Balatan.”

Human sa ilang panihapon, nag-estorya sila didto sa sala. Bisan unsa lang ang ilang gihisgotan, politika, siyensiya, teknolohiya, arte, musika ug uban pa. Ug si Yuri wala gayod palupig kang Salie. Usahay sal-otan sa ulitawo og pasiaw ang ilang gipanagsultihan ug mahitukiki sa kahimuot ang dalaga. Nalingaw siya kang Yuri nga may pagka-siawan usab diay. Apan ang tanan nilang gipanagsultihan misangko gayod ngadto sa ilang gugma.

Wala sila makamatikod nga didto sa gawas tungod sa naglabong nga mga tanom sa silingan ni Salie may usa ka sakyanan nga miurong. Naabli ang pultahan sa walang kilid sa sakyanan ug midapat sa yuta ang mga tiil nga nagsul-ob og leather boots. Nahulog ang upos sa sigarilyo sa yuta ug kini gitumban sa tawo nga dili maila ang panagway tungod sa gisul-ob niining kalo nga gipayungyong ang paldiyas.

Mihinay paglakang ang tawo nga tag-iya sa leather boots paduol niadtong punoan sa kaymito nga may pipila lang ka metros ang gilay-on ngadto sa pultahan sa koral nilang Salie. -- Sumpayan pa