Man Hater

Gula 106

Alas sayis na sa gabii dihang gihatod siya ni Yuri sa iyang gipuy-an. Gipadayon niya ang ulitawo ug gidapit og panihapon. Misanong si Yuri.

Nag-ilis una siya’g sapot sa iyang kuwarto. Pagkahuman midiretso sa kusina ug nagluto sa ilang panihapon. Si Yuri nagtaghulat pagtan-aw sa pasundayag sa telebisyon sa sala samtang si Salie naghikay didto sa kusina.

Natak-ang na niya ang kan-on ug naghiwa na siya sa mga lamas nga isagol sa sud-an nga iyang lutoon dihang gitawag siya sa ulitawo. Dihadiha nanghunaw siya ug gitrapohan ang mga kamot sa gisul-ob nga apron. Si Salie midali pag-adto sa sala.

Naabtan niya si Yuri nga madulotong nagtan-aw sa pasundayag sa TV. Iyang giduol ang ulitawo.

“Unsay balita?” nangutana siya, mora’g dili usa ka reporter sa mantalaan.

“Nadakpan na si Lito Galacia,” tubag sa ulitawo nga ang mga mata wala ibulag sa telebisyon.

“Kadtong buang nga milayas sa mental?”

“Oo. Ug giangkon niya sa atubangan sa mga awtoridad ang pagpatay niya sa usa ka babaye.”

Nahitutok si Salie kang Yuri. “Si Debbie Balatan ba?”

Mipakibo sa abaga ang ulitawo. “Di ko makaseguro. Wala siya mohisgot og ngalan.”

Gipakita sa TV ang panagway ni Lito Galacia. Midiyong ang mga mata ni Salie ingon man si Yuri nga nagtan-aw niini.

Tag-as og buhok si Lito. May bigote ug bangas nga nakapasamot sa ka bagis niining tan-awon. Kaamgid si Lito, nakamatikod si Yuri sa gihulagway ni Vicky nga maoy nagkuha kang Debbie Balatan niadtong gabii nga ang babaye gipatay. Ugaling lang kay wala kini magkalo, wala magsalamin ug wala bangani’g lastiko ang tag-as nga bungot. -- Sumpayan pa