Mata sa Kasingkasing

Gula 110

“Salamat na lang sa imong concern. Ayaw kabalaka. Kun unsay mamahimong linugdangan ning pagpakigrelasyon ko kang Robert, ipasalig ko kanimo nga dili ko kini pagabasolan. Ug hangyoon ko sab ikaw ayaw hukmi ang pagkatawo ni Robert. Pareho baya mong lalaki.”

Wala makatingog si Erik.

Sukad niadtong higayona, wala na gyud magkasulti pag-usab sila si Angeline ug Erik.

Nagpadayon ang relasyon nila ni Angeline ug Robert. Bisan kanunay silang magkita sa tulonghaan, magkanunayan usab si Robert sa boarding house ni Angeline. Misamot ang kahugot sa ilang bonding isip managtrato.

Pero nunot sa pagpanglabay sa mga adlaw, nasuta ni Angeline nga wala pa gihapon siya makakat-on sa paghigugma kang Robert. Si Erik pa gihapon ang gipitik sa iyang kasingkasing.

Hangtod nga miabot ang higayon nga dili na siya malipayon sa relasyon nila ni Robert. Dili na niya mahimo ang pagpakaaron-ingnon. Gikapoy na siya sa relasyon nga wala’y gugma nga nagbugkos. -- Sumpayan pa