Hapit nalang mabuntag wala lang gihapon mahikatulog si Becky. Kanunay hinuon siyang nag-alindasay sa pagsigi og hunahuna sa iyang kahimtang. Naglibog man god siya kun unsay tumanon. Ang gidikta sa iyang mga ginikanan o ang gidikta ba sa iyang kasingkasing?
Kaslunon man god si Becky ngadto kang Ricky. Ang anak sa mga magtiayong negosyante, nga suod kaayo sa iyang mga ginikanan. Nga wala gayud niya higugmaa bisan og gamay nalang. Ug wala gani gayud niya mahimong uyab.
Ug kining gikatakda nilang kasal namugna lamang tungod sa panagsabot sa ilang mga ginikanan. Nga maoy may dakong gusto nga silang duha pagaminyoon. Gani, gipugos man gayud sa iyang mga ginikanan si Becky, kay wala man gayud mahigugma si Becky kang Ricky. Maong misugot na lang usab siya, bisan pa man og duna siya’y uyab. Nga usa ka drayber sa habal-habal.
Maong inay malipay tungod sa umaabot nilang kasal, nagmasulob-on hinuon si Becky. Kanunay lang siyang naglaming sa sulod sa iyang kuwarta. Ug naingon lang hinuon siya sa usa ka binilanggo, nga nagpaabot nalang kun kanus-a siya bitaya.
Sa laktod nga pagkasulti, kanunay lang nga nahasol si Becky. Ug wala na gayud siya’y maayong kinatulgan. Ilabi na nga nag-anam na kaduol ang oras sa iyang kasal.
Misamot ang gibating kahasol ni Becky sa dihang giteksan siya ni Noel. Ang drayber sa habalhabal nga nahimo niyang uyab. Gihagad man god siya ni Noel sa pagpanglakaw, sa hilom. Kun sa panagtaban. Maong misamot hinoon ang gibating kahasol ni Becky. Naglibog naman god siya kun mouyon ba siya sa gisugyot ni Noel.
Gitimbang-timbang gayud ni Becky kun unsay iyang palabihon. Ang gidikta ba sa iyang mga ginikanan o ang gisugyot ba ni Noel, nga maoy tinuod niyang gihigugma ug gimahal.
Nahunahunaan na usab ni Becky ang gisulti sa iyang amahan. Sa dihang nagkanayon kini. “Gamita gayud ang imong utok Becky. Kun maminyo ka kang Ricky, siguro gayud ang mahayag mong kaugmaon. Kay gawas nga anak og mga sapian si Ricky, usa pa gayud kini ka propesyonal. Ug may trabaho na gani.” “Ug timan-i, nga dili ra ba makaon ang gugma.”
Nakaingon hinuon si Becky sa iyang kaugalingon, nga husto ang iyang amahan. Kay siguro man gyud nga si Ricky makahatag kaniya’g maayong kaugmaon. Kay gawas nga anak kinig sapian, may trabaho na usab.
Dako tinuod kaayo og kalainan sila si Ricky ug Noel kun ang pagkabutang lang maoy pagatandion. Kay usa man lang lagi ka drayber sa habal-habal si Noel. Hinuon, kaugaligon nga motorsiklo ang gigamit ni Noel sa pagpanghabalhabal. Iya kining gidata-datahan.
Apan kun ang bahin sa kinaiya ug pamatasan maoy pagahisgutan, mas nakabentaha si Noel kay kang Ricky. Kay mas buotan ug matinahuron man kaayo si Noel. Ug mapaubsanon pa kini kaayo. Ug ang mga hiyas nga gihuptan ni Noel maoy nakapadani kaayo kang Becky.
Kalit lang nga mikiring na usab ang selpon ni Becky. Si Noel gihapon maoy miteks kaniya. Ug nagsuna kini kang Becky kun mouyon ba kini sa iyang sugyot sa pakigtaban. Gireplayan dayon kini ni Becky.
Ug human, kapanulod ni Becky sa usa ka dakong bag ang iyang mga ilisan ug uban pang mga gamit, mihilom dayon siya og kanaog sa ilang balay. Hingpit naman god ang iyang hukom nga tumanon gayud niya, ang gidikta sa iyang kasingkasing. (Katapusan)