Man hater

Wala dayon makaluwat si Salie sa iyang hukom mahitungod sa gugmang gipadayag ni Yuri kaniya. Miligdas ang daghang mga adlaw diin ang ulitawo malaumong nagpaabot sa tubag sa dalaga. Sa kanunay niining pagpamisita sa gipuy-an sa dalaga, si Yuri sa hilom nangindahay nga unta iyang masayran ang tubag ni Salie. Apan si Salie, sa maukitong pagpaniid sa ulitawo, wala gayod maghisgot bisa’g dalikyat lang mahitungod sa gihalad ni Yuri ngadto kaniya.

Milabay pa ang usa ka bulan, ug si Salie wala gihapon sa iyang hunahuna kun sugton ba niya o dili ang ulitawo. Giharian siya sa mga kahadlok ug pagduhaduha.

Sa misunod pang gabii sa pagpamisita ni Yuri kang Salie, ang ulitawo ingon sa nag-anam kaagresibo. Giapiki na niya si Salie aron kini makapakanaog na sa iyang hukom.

“Taas taas na ang kutay sa panahon sa akong pagpailob ug pagpaabot, Salie. Busa gusto na akong masayod sa imong desisyon karon.

“Dili pa ako makahimo og desisyon sa pagkakaron, Yuri. Hangtod karon naglibog pa gihapon ako ug wala makaseguro.”

“Mahitungod sa unsa?”

“Ku n tinarong ug tinud-anay ba gayod kanang imong tuyo kanako.”

“Sa akong pagpaninguha kanimo? May gihambin ka pa ba diay nga pagduda kanako, Salie,” nahisagmuyo si Yuri sa iyang gilingkoran.

Hinay nga miyango ang dalaga, ug dayon miduko siya.

“Siyaro na man sab. Taliwala sa akong pag-antos wa gihapon nimo makita ang akong kamatinud-anon?”

Wala motingog si Salie nga nagpabiling nagduko.

“Sultihi na lang ko sa tinuod, Salie, aron dili ako magsalig. Prangkahi ako kun may luna ba ako sa imong kasingkasing o wala.” -- Sumpayan pa