Gidumtan sa uyoan

Dear Tita Salie,

Maayong adlaw. Tawga lang ko og Ms. K, 19 years of age, single ug may boyfriend.

Two years na ang among relasyon niining akong uyab. Buotan kaayo siya ug wala gyod koy ikasaway niya. Busa tungod sa iyang maayong batasan nga gipakita dali kaayo nga nilambo ang among pagminahalay. Pero wala pa kami anak, apan amo na nga nabuhat ang sex. Nagpaila lang gyod kini nga mahal na kaayo nako siya.

Gusto gyod nako, Tita, nga kun maminyo man gani ko, siya na gyod ang akong mabana. Wala na ko’y plano nga mangita pa og lain kay alang nako siya na gyod ang right guy nga alang nako.

Ang nakaapan lang kay dili ganahan ang akong uyoan niya. Sa akong tan-aw gidumtan siya niining akong uyoan nga wala gyod ko masayod kun unsay hinungdan. Mora og bug-at bug-at gyod ang hinungdan kay gibaharan man ang akong uyab. Ug giapil pa ra ba ko sa bahad sa akong uyoan.

Mao gyod kini ang butang nga wala nako masabti kun nganong ingon ani ang akong uyoan namo. Naglibog gyod ko, Tita, ug nahadlok na hinuon nga ipadayon ang among relasyon. Palihog pasabta ko sa angay nakong buhaton. Thank you very much.

 -- Ms K.

* * *

Hello, Ms. K,

Wala’y laing makatubag sa imong kalibog kundili ang imong uyab. Nasayod gyod kana siya kun nganong nasuko kaniya ang imong uyoan. Tingali kun duna siya’y wala gisulti kanimo tungod kay mahimo nimo kining ikasuko kun ugaling imo kining masayran.

Kun wala usab masayod ang imong uyab bahin niini, mas maayo seguro kun magpakuyog ka sa imong mama o kaha papa aron inyong adtoon ang imong uyoan ug inyong pakig-estoryahan kabahin sa iyang kalagot ngadto sa imong uyab. Tingali kun dugay na kana nga bikil sa pamilya sa imong uyab ug sa imong uyoan. Pangayo lang og husay ngadto kanila aron gawasnon kana ug wala kanay angay pang hunahunaon ug kahadlokan.

Kun imong masayran nga dunay nabuhat ang imong uyab ngadto sa imong uyoan nga dili maayo ug maoy hinungdan nga iya kining gidumtan, dad-a usab kanang imong uyab ngadto sa atubangan sa imong uyoan aron mangayo og pasaylo. Kun adunay giawayan ang imong uyoan ug ang ginikanan sa imong uyab hangyoa siya nga dili na lang kamo iapil pa og kamo nang duha sa imong uyab ang mangayo og pasaylo. Kay dili maayo kun magsugod na unya mo sa inyong pamilya apan duna moy kaaway o kontra.

 -- Tita Salie