Dili pa gayud unta mobangon si Jundel, kay katulgon pa kaayo siya. Kadlawon naman god siyang nahiuli gikan nga nanang-inom kuyog sa iyang mga barkada sa usa ka inilang beer house diha sa dakbayan.
Apan kay gisigihan man siya’g pukaw sa usa sa iyang ka-boardmate, ug giingnan nga dunay nanawag kaniya sa telepono, maong napugos nalang siya pagbangon. Gani, nagsusapinday pa siyang naglakaw paingon sa may nahimutangan sa telepono.
Ang iya diay’ng amahan maoy nanawag kaniya. Ug nagpahibawo kini nga mangabot dinhi sa Sugbo sa sunod adlaw, kuyog ang iyang asawa, nga inahan usab ni Jundel. Ang tuyo diay sa mga ginikanan ni Jundel mao ang pagtambong sa graduation exercises nga ipahigayon sa sulod sa unibersidad nga gieskuylahan ni Jundel. Ug gikatakda nga pagahimuon sa umaabot nga Sabado. Nagtuo man god ang mga ginikanan ni Jundel nga usa na si Jundel sa mogradwar nianang higayona.
Inay bation og kalipay si Jundel, nabalaka na hinuon siya. Nabalaka kaayo siya, kun unsaon kaha niya sa pagpasabot ang iyang mga ginikanan, nga dili siya makaapil sa maong graduation exercises. Kay duna man goy mga subjects nga nahagbong siya. Kun wala siya makapasar. Ug mao kadto ang hinungdan, kun nganong dili siya makapaso sa umaabot nga Sabado kuyog sa iyang mga kaubanan sa klase sa kursong Criminology.
Dali ra kaayo ang pakig-estoryahay ni Jundel sa iyang amahan diha sa telepono. Mora man god siya’g naglikay sa pakig-estoryahay og dugay sa iyang amahan. Nahadlok man god siya nga masipyat unya, sa iyang igsusulti ngadto sa iyang amahan. Mahadlok man god siyang motug-an sa tinuod nga lakaw sa iyang pag-eskuyla. Ug sa hinungdan kun ngano nga nahagbong siya, sa pipila niya ka mga subjects.
Sa dihang nakabalik na si Jundel sa iyang higdaanan, nagsigi na siya’g hunahuna kun unsa unya’y iyang buhaton inig-abot unya sa iyang mga ginikanan. Maoy iyang gihunahuna pag-ayo, kun unsaon niya sa pagpasabot ang iyang mga ginikanan, kun nganong dili siya makaapil sa pagpaso kuyog sa iyang mga klasmet sa umaabot nga Sabado. Mao ra ba untay tuyo sa mga ginikanan nga makatambong sila sa ilang gradwasyon.
Kalit lang nga namalik sa panumdoman ni Jundel ang mga panahon nga nanglabay. Ilabi na ang mahitungod sa iyang pag-eskuyla sa usa ka dako ug inila kaayong unibersidad diha sa dakbayan sa Sugbo. Kadtong mga panahon nga iya lang giusikan. Kay inay igugol unta niya ang maong panahon sa pagtuon sa iyang mga leksyon, didto na hinuon niya igugol sa walay kapuslanan nga mga bisyo. Sama sa pagsulod kanunay sa mga beer house ug mga internetan. Kuyog sa iyang mga barkada.
Ug niini pang higayona, makahunahuna si Jundel nga sayop diay ang iyang gibuhat. Kay kun nagtinarong palang unta siya sa iyang pagtuon, tingali og dili kini mahitabo kaniya. Nga dili na hinuon siya makagradwar, sa umaabot nga Sabado.
Igo lang nga nakapangagho si Jundel samtang naghunahuna sa mga sayop nga iyang nahimo samtang nagpadayon pa ang klase. Sa mga sayop nga mao na hinuoy hinungdan kun nganong dili siya makapaso, kuyog sa iyang mga kaubanan sa klase.
Karon pa siya batia og pagmahay sa mga sayop nga nahimo niya, uban sa iyang mga barkada. Sa hunahuna pa niya, nga kun nagtinarong palang unta siya sa iyang pagtuon, makasalmot unta siya sa graduation exercises. Ug ikalipay gayud unta kini sa iyang mga ginikanan, kinsa naglaum kaayo nga makahuman gayud siya sa iyang kurso. Dako gayud kaayo ang iyang pagmahay ni Jundel sa iyang kaugalingon. Ug dako usab kaayo ang iyang gibating pagbasol ning higayona. (Katapusan)