Bunga sa pagkamatarong

Napugwat ko sa akong gibarogan dihang miduol nako ang tambok nga tawo ug nangasaba. “Nganong gibalibaran man nimo akong order? Wa ka ba mahibawo nga dako na ko’g pilde?” Haskang isoga sa iyang nawong. Kumakao’g tawo. Kasumbagon nako. Maayo gani kay napugngan sa among security.

Naugbok ko sa akong gitindogan. Morag ice nga nalanay. Wa gyod ko magtuo nga iya kong kasab-an atubangan sa daghang tawo.

Mao man god ni akong trabaho. Tig-aprob sa order sa mga kustomer nga kusog moduwa. Ang nakaparat lang kay ang maong tawo, hinay kaayo mosugal. Busa di gyod malargahan ang tanan niyang order.

“Unsa, wa ka makakita ini?” Gihikap niya ang mga dagkong bulawang kuwintas ug bracelets nga nangumbitay sa iyang liog ug bukton. Gusto niyang pasultion ang mga alahas unsa siya ka adunahan. Gusto niyang ibandilyo sa tibuok palibot nga siya usa ka hari ug kutob sa unsay iyang gusto maoy matuman. “Unsa, wa ka makaila nako?” Mitaas iyang tingog. Unya, duna siya’y gitawagan sa iyang selpon.

Taudtaod, mikiring sab ang gibitbit kong wireless phone. Gitubag ko. Gikan diay sa among opisina, nagpahibalo nga paadtoon dayon ko sa among labaw.

Didto sulod sa opisina, gikasuk-an ko pag-ayo sa among manedyer. “Doddie, nganong wa man nimo aprobahi ang tanang order adtong kustomer?”

“Wala pa man god siya’y puntos, Boss. Ikaduha, ginagmay lang moduwa.” Pangatarungan ko.,

“Mao ba? Ay, sige lang. Aprobahi lang!” Mandar sa among labaw. Unya, iya kong gihunghongan kinsa ang gitawag sa customer. Nalum-it akong agtang pagdungog ko sa ngalan. Wala tuyoa, miigang akong lawas. Very influential man god ang maong tawo. Terror. Ug gikahadlokan sa mga empleyado. Kay kutob sa trabahante nga gireklamo, gibalhig layo nga branch palayo sa iyang pamilya. Apan wa ... wa gyod ko mahadlok. Nganong mahadlok man ko nga gitrabaho man lang nako ang unsay gusto sa kompaniya?

Dali ra kaayong mikalat ang maong balita sa among trabahoan. Kutob sa kinsay nasayod miduol nako ug miingon: “Naa, andam-andam na lang sa imong travelling bag, Dodds, kay seguro gyod nga i-transfer ka na.

Dangtag usa ka semana, may miabot nga office order gikan sa among main office, Manila. Akong ngalan ra ang nasulat. Nagkurog akong mga kamot nga miukab sa dokumento nga gitunol sa among labaw. Wala ko kapugngi ang kakulba nga mipukpok sa akong dughan. Mitulo akong luha dihang nabasa ko ang kinatibuk-ang unod sa office order. Tungod kay dili man para transfer ngadto sa layong branch ang maong sulat-pahibalo. Kondili, promotion diay! (Kataposan)