Igo palang gani nga namanagbanag didto na si Berto sa may gamay’ng Giwanon diin mahimutang ang iyang uma. Igo lang gani siyang miinom og init nga tubig nga gibutangan og luy-a, sa dihang mibiya siya sa ilang balay.
Duna man god siyay buot panid-an nianang higayona. Naka-tip man god siya nga nianang mga orasa, nga mingaw pa kaayo maoy igsiaw sa mga kawatan og saging ug mga lubi. Magsakay man diay kuno kini’g baruto, nga mao usab ang kargahan sa ilang mga kinawat.
Nagduda man god si Berto nga ang ila na usab kasagingan mao na say rumbohon sa mga kawatan. Ilabi kay puwerte kaayong pagpamulig sa ilang mga saging. Ug anaa sab kini mahimutang sa awaaw ug hilit kaayo nga dapit. Nga dili kaayo agian og tawo. Gawas pa, duol ra kaayo kini sa dagat.
Mainampingon kaayo si Berto nga misuot sa ilang kasagingan. Nagmatngon gayud siya pag-ayo nga dili makahimo’g kasaba kon kasikas. Dili man god siya buot nga mamatngunan hinuon siya sa mga kawatan og saging.
Pagkataudtaod, nakabati si Berto nga dunay nanag-estorya dapit sa may katunggan. Mga tingog sa lalake maoy iyang nabatian. Apan mora’g pinugngan kaayo ang mga tingog. Daw mahadlok nga mabatian.
Midali dayon og pasalipod si Berto sa dakong punoan sa Bogo. Nga diha gayud magturok sa may tinubdan sa Giwanon. Naniguro siya nga dili gayud makit-an, pananglit dunay mga tawo nga mangabot.
Wala madugay, nakit-an niya ang duha ka mga tawo nga nagdala og mga sako nga nagpadulong sa ilang kasagingan. Ug wala madugay, misugod dayon ang maong mga tawo sa pagpanuba sa mga saging. Maayo ra ba kaayo kining mamili, kay ang mga saging ra gyud nga may mga dagkong bulig maoy gipanuba. Ginamit ang mahait kaayo nilang mga sundang.
Wala na magpaabot pa si Berto og laing higayon. Gikuot dayon niya ang iyang selpon diha sa bulsa sa iyang purol ug misugod dayon sa pagteks. Maoy iyang giteksan si Berto ang umagad niyang polis, nga diha ra usab madestino sa ilang lungsod. Gisabot na diay’ng daan ni Berto ang iyang umagad.
Wala madangtig dugay, nahiabot ang umagad ni Berto nga usa ka polis. May kuyog pa gyud kining laing duha ka polis. Nga taga diha ra usab sa ilang dapit ni Berto. Ug gipang-aresto niini ang duha ka mga tawo nga nanuba’g mga saging. Naabtan man gyud nila kini.
Igo lang nga nakapanglingolingo si Berto nga nagtan-aw sa duha ka mga kawatan og saging. Ilabi na kay nakaila kaayo siya sa usa niini. Kay mao man kining tawhana ang magpunay og hangyo ngadto kang Berto, nga siya lang maoy mamalit sa mga saging nila ni Berto. Gani, mibisita pa kini didto sa ilang kasagingan ni Berto, sa milabay nga adlaw.
Maayo gyud diay og kalaki ang maong tawo. Nga magpalansis lang diay kini nga mamamalit og mga saging, apan kawatan diay’ng dako. (Kataposan)