Gula 101
“Tungod kay akong namatikdan nga misamot ang inyong kasuod karon.”
“Managhigala lang mi sa pagkakaron. Pero ayaw kabalaka, Erik. Kun magkarelasyon man gayod kami si Robert, ikaw ang una nakong tug-anan.”
“A-ang buot mong ipasabot nga posibleng dawaton mo ang iyang gugma?”
“Depende. Kun magkasinabot mi.”
“Isip imong higala, pahimangnoan ko ikaw nga ayaw gyud pagkompiyansa kang Robert. Tingalig gipasulod ka lang niya sa iyang laang. Tingalig igo ka lang niyang dula-dulaan ug pasakitan.”
“Daghang salamat sa imong pahimangno.”
Nahilom sila sa makadiyot. Unya gitipas ni Angeline sa laing tema ang ilang panagsulti.
“Kumosta na man mo si Almina?” Gipangutana niya si Erik.
“One click,” laktod nga tubag ni Erik.
“Unsay one click?”
“Gipanguyaban ko na siya. Ug wa gyu’y kuskos-balungos. Ni-yes dayon siya. Trato na mi.”
“Congratulations...” -- Sumpayan pa