Swimming Lesson

Wala g’yud mahimutang si Zeny nga naghuna-huna sa kalalim nga iyang gibati dihang gitudloan siya ni Philipp kun unsaon nga makamao siya molangoy.

Kauban ni Zeny ang upat niya ka mga higala nga babaye nga nangaligo didto sa usa ka beach resort sa Lapulapu usa ka Domingo kaniadtong Pebrero. Sa ilang lima, siya ra si Zeny ang dili maantigo molangoy.

Samtang lingaw kaayo ang iyang mga higala nga naglangoy-langoy, si Zeny igo lang nagtindog sa tubig nga taga dughan. “Sawom na Miss!,” may nadungog nga tingog si Zeny.

Nagtoo si Zeny nga siya g’yud ang giawhag nga pasawmon sa dagat. Gihangad ni Zeny ang pangpang nga diha sa iyang luyo ug nakita niya ang lalaki nga nagngisi samtang nagtan-aw niya. Igo lang mipahiyom si Zeny ug milingo-lingo. “Tudloan tika’g langoy Miss!” misinggit ang lalaki nga didto nagpaniid ra diay kaniya sa pangpang. Nakita ni Zeny nga miambak sa dagat ang lalaki.

Gitan-aw ni Zeny ang tubig sa dagat nga didto miambak ang tawo apan nalinaw na lang ang tubig wala kini motunga. Taud-taud, nakurat si Zeny kay mitunga diha sa iyang atubangan ang usa ka tawo nga nagngisi.

“Tudloan tika og langoy Miss,” matud sa lalaki. “Maayo ka diay mosawom no kay layo man kaayo kadtong imong giambakan pero naabot gihapon ko nimo pagsawom,” matud ni Zeny.

“Kamao ‘sab og gamay. Ako diay si Philipp, kauban nako kanang pundok sa mga babaye’g-lalaki nga anaa nianang cottage ... mga reporter na sila,” matud ni Philipp nga nagpaila kang Zeny. Mibalik paglangoy paingon sa nahimutangan ni Zeny ang upat ka kauban niya nga mga babaye. “Ah, may amigo na man si Zeny!! Inggit lang mi da,” hapit magkadungan ang duha ka kaubang babaye ni Zeny.

Nagkatawa usab ang duha ka laing higala ni Zeny. “Siya diay si Philipp, reporter kuno siya ug kauban niya nga mga reporter sa radyo ug newspaper kanang anaa sa unahan,” matud ni Zeny.

“Akong tudloan si Zeny paglangoy kay nalooy ko nga inyo ra siya nga gibiyaan ganina,” giingnan ni Philipp ang upat ka kauban ni Zeny. “Sige tudloi para makamao na molangoy,” matud sa usa ka babaye. Gisugdan dayon ni Philipp ang iyang plano. “Dali, igunit ang duha nimo ka kamot sa akong abaga ug itindak-tindak ang duha nimo ka tiil,” ni Philipp pa nga mitalikud kang Zeny. (Sumpayan)