Housemaid

Gula 7

Wala gayud makapugong si Saling sa iyang gibati, gigakus niya si Arman. “I love you too Arman, apan nasayud ko nga dili magdugay ang atong relasyon.”

“Salamat kaayo Ling nga wala nimo ako pakyasa. Ikaw ang dad-on nako sa altar sa kaminyoon,” giingnan ni Arman ang ilang katabang. Nag-ukobay ang masi’g nila ka mga ngabil.

Nagsugnib kini og grabe nga kainit sa tagsa-tagsa nila ka kaugalingon. Nagkainit ang ilang pagparayganay hangtud nga wala nila damha nga hinay-hinay sila nga giganoy sa tentasyon.

Paglabay sa mga tunga sa oras.... “Mauwaw na ko nga moatubang ni Mama nimo Arman. Nasayud ko nga ubos na unya kaayo ang iyang pagtan-aw kanako tungod sa pagpakiglambigit ko kanimo,” matud ni Saling.

“Ayaw kabalaka mahitungod niana Ling, daan na kami nga nagkasabot si Mama nga dili siya magpili kinsa ang mamahimo niya nga umagad ug sigurado ko nga malipay pa gani siya nga ikaw ang akong mahimong asawa,” ni Arman.

Nagdungan sila nga migawas sa kwarto. Taud-taud, nadungog nila nga may nagtuktok sa pultahan. Si Arman ang miabli. “Good morning Ma,” matud ni Arman nga nagpahiyom.

Wala makapugong si Nang Dading sa pagpahiyom na lang ‘sab nga nagtan-aw sa iyang anak kay nalipay siya nga daw wala na maguol si Arman bisan og mitaho kini kaniya nga nagkabuwag sila ug ang iyang girlfriend.

“Sori kaayo Ma ha nga nahubog ko kagabii sa akong pagpauli, dili na kadto mahitabo pa,” matud ni Arman nga miagbay sa iyang inahan nga basa pa sa singot nga gikan nga nag-jogging.

Naligo si Nang Dading samtang si Saling nag-andam sa ilang makaon. Dayon nagdungan silang tulo sa pagpangaon. “Gwapa kaayo karong buntaga si Saling Ma no?” giingnan ni Arman ang iyang inahan.

Miduko si Saling nga wala magpaabot nga kadto maoy isulti ni Arman sa iyang inahan. Mitutok si Nang Dading ni Saling. “Gwapa bitaw kini si Saling. Abi man gani nako og imo siya nga girlfriend dihang gikuyog nimo siya dinhi sa una nga higayon,” sa inahan pa.

“Sigurado ko nga daghang nangulitawo nimo Ling no kay gwapa ka gud?” gisukna ni Nang Dading si Saling. Wala motubag ang dalaga.

“Mosugot ka ba Ma kun mangulitawo ko ni Saling?” giingnan ni Arman ang iyang inahan. “Sus, wala g’yud ko’y pagsupak anak bisan kinsa ang imong mapilian nga pakaslan,” dali nga tubag sa inahan.

 Diha-diha, wala kapugngi ni Arman nga giagbayan si Saling ug miingon. “Imo na unya siyang umagad Ma.” Gihagkan ni Arman ang dalaga samtang nasurpresa pag-ayo si Nang Dading. (Kataposan)