Housemaid

Gula 6

“Nalooy baya ko nimo nga naghuna-huna nga nagkabuwag kamo ug ang imong girlfriend kay giisip ko na ikaw nga igsoon,” matud ni Saling.

Napagakus si Arman kang Saling. “Salamat kaayo Ling nga mibati ka’g kalooy kanako. Ang tinuod naguol ko sa among panagbuwag gabii, apan karong buntag nakaingon ko nga mas maayo nga nasayran ko ang iyang batasan mentras sayo pa.”

“Kana ang buhata Arman. Cheer-up g’yud dili kay maghubog-hubog. Ako bitaw, tug-anan na g’yud tika, nagbuwag mi og ang akong boyfriend paggikan nako sa probinsya kay namugos man g’yud ko nga moanhi sa siyudad aron manarbaho, pero karon nalimtan ra nako siya,” matud ni Saling.

Nagkatinutokay silang duha si Arman ug Saling. Daw nagkasultihanay ug nagkasinabtanay ang masi’g nila ka mga mata. Takulahaw nga nagakus ni Arman ang dalaga.

“Saling, sa imong kabuotan nga gipakita kanako, hinay-hinay ko nga nakat-on pagmahal kanimo. Ayaw intawon ako og pakyasa. I Love You Ling,” ni Arman nga mihugot pa sa paggakus kang Saling.

Hinay nga giwakli ni Saling ang mga bukton ni Arman nga migakus kaniya. Mitulo ang mga luha sa dalaga. “Nganong mihilak ka man Saling? Nasuko ka ba nga nasayod nga may pagbati ako kanimo?” gisukna ni Arman si Saling.

Miduko si Saling nga naglingo-lingo. “Wala.. wala ako masuko nimo Arman. Apan dili nako madawat ang imong gugma kay katabang ra ko ninyo ni Mama nimo.”

“No, ayaw’g ipakaubos ang imong kaugalingon Saling... ang tinuod, bisan sa wala pa kami magkabuwag ug ang akong kanhi girlfriend, may pagbati na nga migitib sa akong kasing-kasing para kanimo,” matud ni Arman nga migunit sa kamot sa dalaga.

Mitindog si Saling. “Sige na Arman, tiwasa na pag-inom ang imong coffee para mahuwasan ka sa kahubog. Dala ra sa kahubog ang imong giingong pagbati kanako.”

Migawas na unta si Saling sa kwarto ni Arman dihang mitindog ang ulitawo ug gigunitan ang iyang kamot nga mibukas na unta sa siradora. “Ayaw ako pagpakyasa sa akong paghigugma kanimo Ling. Usbon ko, I love you.”

Wala makabantay si Saling nga gihagkan ni Arman sa aping. “Arman, ang tinuod, may pagbati usab ko para kanimo apan wala’y kaugmaon ang atong mga pagbati kay katabang ra ko ninyo,” nanglugmay na usab ang luha sa mga mata ni Saling. (Sumpayan)