Mata sa Kasingkasing

Gula 98

Wala na mukanaog si Robert sa traysikol paghunong niini sa tungod sa iyang boarding house. Igo lang siyang gipakanaog niini ug mipadagan dayon ang driver sa traysikol aron ihatod si Robert ngadto sa gipuy-an niini sa Mango District.

Nagkalawom na ang kagabhion. Mosulod na unta si Angeline sa balay nga iyang gipuy-an sa dihang may nanitsit kaniya. Milingi siya ug maoy iyang nakita ang usa ka lalaki nga nagpaingon kaniya. Nakugang siya kay si Erik ang maong lalaki.

Kadali rang nakaduol si Erik sa gibarogan ni Angeline.

“Nag-unsa ka dinhi niining orasa sa kagabhion?” Gipangutana ni Angeline si Erik.

“Angay pa ba kanang ipangutana?” Misumbalik pagpangutana si Erik. “Akoy angay mangutana kun nganong karon ka lang nahiuli.”

“U-unsa?”

“Kaganina ra kong nagpaabot nimo. Way bisan usa sa imong mga ka-boardmate ang nakasulti nako kun hain ka.”

“Ug nganong nangita ka man nako?” -- Sumpayan pa