Magsoon sa amahan

Ayaw pakigsuod anang Jack Tibon kay mga kaliwat nag palikero iyang pamilya. Basig mabiktima ka lang unya ana” ni Delia Buaya ngato sa iyang kamaguwangang anak dalaga nga si Abet. Naglingkod si Abet sa iyang lamesa ug nagkalingaw og pagklipakli sa mga Financial Statement sa ilang negosyo.

Nakamatikod ang inahan nga hapit tanang tawag sa telepono ni Abet puro gikang Jack. Lain pang teks ug tawag sa selpon. Nagbarog ang inahan sa walang kilid sa lamesa sa anak. Nanighawak. Niyahat si Abet sa iyang inahan.

Nagkahinabi ang inahan ug anak rong sayong kahaponon sulod sa ilang opisina nga nahimutang sa ilang private wharf. Dako’g negosyo nga panagatan ang pamilya ni Delia. Duna sila’y napulo ka dagkong fishing boat. Iyang bana nga si Nino may lisensiya nga Major Patron. Maoy nagdumala sa ilang mga fishing boats. Maglabing panahon sa biyahe sa kadagatan. Unya si Abet nga usa na ka CPA, ila pang gipaeskuyla og abogasya. Aron maoy makapanalipod sa ilang mga negosyo. Ug si Delia nisugodsugod nag entra sa politika sa mao gihapong katuyoan. Usa na siya ka konsehal karon sa ilang lungsod sa Vedanta.

“Naunsa ka ba Ma oy? Ngano mora man sab kag wa kaagi sa pagkadalaga. Gikalingawan ko lang na si Jack. Kay boring man sab kaayo nga akong panahon natingub na lang sa opisina ug eskuylahan” mapahiyomong tubag ni Abet sa inahan. Nilakbit siya’g lantaw ngadto sa lawod nga makita ra sa siradong bintana nga bildo. (Air conditioned man ilang buhatan).

“Aw lagi. Abi nakog nagpadala na kas tama anang lakiha,” ni Delia. Seryoso ang hitsura. Wa siya malimot sa dautang kasinatian niya sa amahan ni Jack nga si Ritchie. Nagkahigugmaay sila ni Ritchie sa wa pa niabot sa kinabuhi niya si Nino. Nabaniog gani sa tibuok lungsod nila nga kaslonon na sila. Kasal na lang sa simbahan ang kulang. Kay nakasal na sila sa banig.

Dihang wa na duawa si Delia sa binulan niya nga sakit, gipahibawo niya si Ritchie. Pagkasayud sa ulitawo, namid-ok lang. Ug wa nitingog. Human adto nikalit lag kahanaw si Ritchie. Uwahi na pagkasayod ni Delia nga gipalarga si Ritchie sa America. Ang ginikanan ni Richie wa kauyon niya nga anak lang og drayber sa bus. Mga adunahan ang ginikanan ni Ritchie. May dakong convenient store sa ilang lungsod. Duna pay mga apartment ug commercial complex nga gipaabangan.

Naglaraw og panimalos si Delia. Giswerte hinoon siya dihang nipakitag gusto niya si Nino. Adunahan sab ang pamilya ni Nino. Tag-iya’g mga lantsa nga tigbiyahean ngadto sa mga gagmay’ng isla sa ka-Bisayaan. Wa niya dugaya ang pagsugot ni Nino. Tulo na ilang anak paghiuli ni Ritchie gikan sa America. Ug naminyo na sab siya’g usa ka Pinay nga nagtrabaho sa Amerika.

Gilikayan ni Delia si Ritchie. Ang iyang gugma sa naulahi napulihan sa pagdumot. Unya, karon, ang anak na sab ni Ritche ug iyang anak ang magkarelasyon. Kanay dili gyud mahimo!

“Pero Ma, unsa may dautan kun magkauyab mi ni Jack? Ikaw ra bay kamaong motilaw og Tibon?” ni Abet. Nagpahiyom. Daw natuk-an si Delia. Pwerteng panglipaghong. Aron di niya hisagpaan ang anak, nisirit na lang siya’g lakaw. Nangablis pultahan ug nipadayoghog ngadto sa pantalan. Nakaamgo si Delia nga gahi og ulo iyang anak. Liwat niya. Gusto gyung maghimog eskandalo. Dili siya kaako sa pagsulti nga magsoon sa amahan sila si Abet ug Jack. (Katapusan)