Housemaid

Gula 4

Nanglabay ang mga adlaw ug nagkasuod sila’g maayo si Saling ug Arman. Si Saling maoy tigtempla sa coffee ni Arman matag buntag.

“Kaswerte sa imong mabana Saling kay sigurado ko nga maayo ka moatiman og bana ug gwapa pa g’yud,” giingnan ni Arman ang dalaga usa ka buntag niana. Igo lang mipahiyom ang dalaga nga nakadungog sa pagdayeg ni Arman.

Wala tuyoa ni Arman nga hinay-hinay siya nga nakat-on pagmahal ni Saling. Inanay niya nga nasuta ang kabuotan sa dalaga ingon man ang talagsaon niya nga katahum.

Usa ka adlaw, nagabhian si Arman sa pagpauli. “Asa pa man kaha si Arman. Teksi kuno si Arman day, dia ang akong selpon,” mabalak-on kaayo si Nang Dading nga wala pa mauli ang anak.

Nabalaka sila si Saling kay wala motubag si Arman ug dili usab makontak ang iyang selpon dihang gisuwayan nila’g tawag. Dili sagad nga gabii na nga mopauli si Arman mao nga nabalaka pag-ayo ang inahan sa ulitawo.

“Adto lang usa ko sa kwarto Saling tawga lang unya ko kun muabot na si Arman,” matud ni Nang Dading. Lakip si Saling wala mahimutang. Nagkalingaw lang siya’g tan-aw sa TV shows, apan dili gihapon siya makalimot ni Arman.

Alas dies na lang sa gabii wala pa si Arman. Taud-taud, nakadungog si Saling og sagudsod sa sapatos. Gibuksan ni Saling ang pultahan ug nakita niya nga mao g’yud ang pagkalup-og ni Arman ngadto sa yuta.

Gikulbaan pag-ayo si Saling mao nga nahadagan siya ug gitabang ang ulitawo. “Arman...naunsa ka man? Uy, hubog ka man diay,” gitabangan ni Saling nga makabangon ang ulitawo sa iyang pagkahilukapa. Nakita niya nga nagpiyong ang mata ni Arman. “Dali gunit nako aron makasulod ka sa balay,” matud ni Saling. “Anaa na ba si Arman day?” nadungog ni Saling ang tingog ni Nang Dading gikan sa taas.

Gipalingkod ni Saling si Arman sa sala ug dali siya nga mikuha’g face towel nga gibasa niya og init-init nga tubig. Mibalik siya sa nahimutangan ni Arman ug gitrapohan ang ulitawo sa nawong, liog dayon sa duha niini ka bukton.

“Anak, nganong naghubog-hubog ka man tawon? Dili man kini sagad nga mahubog ka,” nakapangutana si Nang Dading sa anak. “Nagbuwag mi ug ang akong girlfriend Ma, sakpan nako nga may lain siya Ma,” nagkanguhal si Arman paglitok.

Gitabangan nila ni Nang Dading ug Saling pag-agak si Arman paingon sa iyang kwarto. (Sumpayan)