Ambisyosa si Tasya

Nay Soling, nagkasabot mi ni Tasya nga manarbaho mi sa gawas sa atong nasud isip caregiver. Adto mi trabaho sa Canada ug dolyar ang sweldo didto,” namulong si Tasya sa iyang laraw ngadto sa iyang inahan samtang nagharos kini sa kamunggay nga subakan og bulinaw alang sa ilang paniudto.

“Uy, dolyar tuod apan mangita man kita og dakung kantidad nga ibayad sa placement agency kon recruiter alang nianang butanga,” timang pa sa iyang inahan.

Si Tasya bugtong anak nila ni Soling ug Andoy nga usa ka masyador sa bulangan.

“Sayon ra man na Nay. I-prenda lang nato ang atong uma ug ibaligya sab nato ang nati natong baka, siyaro kun dili makabayad sa agency. Maharuhay na unya ang atong pagpuyo kay makadawat na man mo si Tatay og allotment sa akong sweldo kada bulan,” tambag pa ni Tasya samtang nag manicure kon nagpasinaw sa iyang mga kuko sa kamot dapit sa ilang kayda.

Pila ray estorya, nakahipos gyud sila og singkuwenta mil ka pesos aron ibayad sa agency.

“Maayo Tasya kay desidido gyud kang mo-abroad. Kumo kay nakabayad ka na man sa placement fee, sunod bulan larga ka na,” pasalig ni Madame Rose, manedyer sa agency nga giaplayan niya.

Abtik ang mga lakang ni Tasya nga mipauli sa ilang balay.

“Unya, nakabayad ka na man, makalarga ka na gyud?” nangutana si Nanay Soling niya.

“Aw, segurado na gyud, sunod bulan ang akong larga. Ug Nay Soling, sa dayon nakong larga, mag salu-salu kon maghikay kita isip despedida ba,” mihangyo si Tasya ngadto sa iyang inahan.

“Aw, kana lang diay, ihawon kon lapaon nato kanang duha ka buok baboy aron magmasadya kita,” pasalig pa sa iyang inahan.

Miabot na ang sunod nga bulan. Miadto dayon si Tasya sa opisina sa agency nga nahimutang sa ilang lungsod. Nakurat ug nasagmuyo siya sa paghitangka niya sa opisina kay sirado man ug daghang mga tawo ang nag-usisa.

Nasayran ni Tasya nga “fly-by-night” diay ang agency nga iyang naaplayan ug nahatagan sa kwarta.

Dungog-dungog niya nga sa miagi pang semana nga nanibat padulong sa laing dapit ang mga personahe sa opisina aron mamiktima na usab og laing mga aplikante.

Nahugno ang mga pangandoy ni Tasya ug mora’g gitabunan siya sa kalibutan niadtong higayona.

Busa, kinahanglan gyud nga dili kita magpadali-dali sa atong hunahuna.

Sutaon gyud nato ang usa ka opisina kun dili ba kini usa ka peke aron dili kita mabiktima sama kang Tasya! (Katapusan)