Mata sa Kasingkasing

Gula 94

Nianang udto sa adlaw’ng Domingo, mibalik na si Angeline ngadto sa dakbayan sa Tagbilaran.

Pagkaugma, pagsulod ni Angeline sa tulonghaan, nakita niya si Erik ug Almina nga nagsultihanay sa gawas nga bahin sa audio-visual hall. Nakasabot dayon siya sa kahulogan sa iyang nakita. Gilainan siyang nagtan-aw sa duha. Midali siya pagbalik sa iyang agi samtang wala pa sila makakita kaniya.

Didto dad-a si Angeline sa iyang mga lakang sulod sa library. Milingkod siya sa bakanteng lingkoranan atubangan sa taas nga lamesa. Nalayo siya’g diyotay sa ubang mga estudyante nga nagbasa ug nagtuon.

Samtang naglingkod, maoy iyang gihunahuna sila si Erik ug Almina. Gisakitan siyang nagtan-aw sa duha nga seryosong nagsultihanay didto sa gawas nga bahin sa AV Hall kaganina. Usa ray kahulogan sa iyang nakita. Gitinuod gayod ni Erik ang gisulti niini kaniya nga panguyaban na niini ni Almina. Ug seguradong magkatrato dayon ang duha.

Dinhi hingpit na gyung nawagtang ang paglaom ni Angeline. Hingpit na gyud nga nahanaw ang kahigayonan nga magkatakdo ang duruha ka pagbati nila ni Erik. -- Sumpayan pa