Biktima sa pasalig

Dili ikalimod nga gwapa gayud si Fritzie. Si Fritzie, bugtong anak sa magtiayong Raffy ug Aiana. Ang inahan ni Fritzie nga si Nang Aiana may dagway kining ikasarang o matahom pud kini. May kaliwat man gud kining Instik maong lahi ra gyud ang katahom niini, ikompara sa uban. Ug si Nong Raffy naman usab dili pud kini kabintahaan kay may kaliwat man pud kining Italyan (Ita ug Mangyan, hehe...he).

Ug tungod kay hitsuraan ang mga ginikanan ni Fritzie ug kung unsa ka matahom ang iyang inahan doblehon o pik-on kini ka duha sa kaanyag ni Fritzie. Ang dagway niini susama sa Brazilian actress sa telebisyon nga maoy gitumbok nga rason sa panagbulag sa manag-uyab nga silang Vic Sotto ug Pia Guanio.

Ug gani si Fritzie nabaniog sa ilang dapit sa balangay di-makulkog nga maoy labing matahom nga susama ni Eba. Ug tungod niini nagpusot-pusot ang mga tanyag kaniya nga himuong modelo o endorser sa mga nagkandalaing produkto sama sa asin, tawas, bahug-bahug, rugby ug uban pang produktong Pinoy.

Apan kining tanan wala panumbalinga ni Fritzie ug tungod niini daghan ang wala kasabot og nganong wala man niya dawata ang maong mga tanyag.

“Naunsa naman ka day oy! Nganong wala man nimo pahimusli ang kahigayonan nga mamahimong model?” ni Kae Marie pa, suod nga higala ni Fritzie.

“Dili lang ta’ maghisgot ana day! Maypag tabangan ko nimo’g laba aning akong labhunon,” ni Fritzie pa ngadto ni Kae Marie.

Mosikat o mamahimong artista ang iyang higala nga unta alang kaniya dili na angayang palabyon pa ug mao pud kini ang gipambati sa uban nga higala ni Fritzie nga silang Rosemarie, Elizabeth, Alona, Jessel, Dawn ug April.

Ang matuod nga hinungdan niini nganong wala pud mihinayak si Fritzie sa pagsulod sa natad sa showbiz kay tungod sa iyang mapinanggaon nga inahan nga si Nang Aiana. Biktima sa pasalig sa iyang tagdumala kaniadto.

Si Nang Aiana diay usa sa mga lig-ong artista sa dekada otsenta (80) kaniadto apan tungod sa wala’y ayong tagdumala sa iyang career wala’y laing ni datu o naadunahan kundili ang nagdumala lang sa iyang career.

Ug labaw sa tanan simple lang ang pangandoy ni Fritzie sa iyang kinabuhi maong wala niya dawata ang mga nagkandalaing tanyag kaniya. (Katapusan)