Pakamatyan gyod

Dear Tita Salie,

Have a nice day. Tawga lang ko sa pangalan nga April, 35 years of age, minyo. Apan duna ko’y uyab sa hilom ug nagpangidaron na siya og 28 karon.

Perti gyod namong amping nga dili gyod mabuking ang among sekreto. Nahadlok baya ko nga masayran sa akong bana kay sigurado ko nga dako gyod kining gubot sa among pagpuyo. Apan nadala lang gyod ko sa tentasyon, Tita. Maayo man gud kaayong mopagana og estorya kining akong uyab. Minyo na siya apan buwag na sa asawa. Dali ra kaayo kong nadala sa iyang mga pakatawa.

Apan karon nahadlok ko nga masayran sa akong bana kay duna ra bay giingon nga walay asong makumkom. Busa, akong gibulagan ang akong uyab. Naglikay lang ko sa mahitabo unya kun ugaling masayod ang akong pamilya. Apan ang problema karon, Tita, kay dili man mosugot kining akong uyab magbulag mi.Ug nahadlok nako kay niingon man siya nga iyang pakamatyan ang iyang gugma ngari kanako.

Mao gyod kini ang nakahasol karon nako. Palihog tabangi og tambagi ko sa angay nakong buhaton. Daghang salamat sa pagtagad. God bless. -- April

* * *

Dear April

Kanunay gyod unta natong hunahunaon nga sa tanang butang nga atong nahunahunaang buhaton atong makita pag-una ang iyang kinatibuk-an. Nga sa dili pa kini nato buhaton ato nang makita ang atong sitwasyon kun ugaling atong buhaton ang maong butang. Kinahanglan usab nga atong makita ang sangputan niini. Ato untang sutaon kun dili ba kita magproblema sa atong gustong buhaton. Nga dili lang unta ang enjoyment ang atong makita. Ug kun atong makita nga dunay problema sa umaabot, dili nalang nato ipadayon ang atong plano.

Apan anaa kana sa maong sitwasyon, April ug dili na nato puyde nga ibalik ang mga panghitabo. Busa, paningkamoti nga makalikay ka sa maong sitwasyon ug makalikay ka sa imong kabit.

Ayaw na siya hatagi og pagtagad kun gusto ka nga dili mabungka’g ang imong pamilya karon. Kun mabutyag ang inyong sekreto ikaw ang alkansi, kay aduna ka pay pamilya nga kompleto pa gihapon. Wala na siya’y angay kabalak-an pa kay naguba na ang iyang pamilya. Busa, ayaw itugot nga mausik ang inyong maayong pagpuyo.

Putla ang inyonog relasyon, pinaagi sa pagputol sa inyong communication. Ayaw na paminaw sa iyang mga pulong. Ayaw paabota nga masayran sa imong bana ang imong binuang kay sigurado ko nga dako gyod kining gubot. Mas dako pa kay sa gisulti sa imong hinigugma sa hilom. -- Tita Salie