Mata sa kasingkasing

Si Carmi unta ang una niyang tabangan kun may ikasarang na unta siya. Apan naminyo na si Carmi. Dili pud niya mabasol ang iyang manghod nganong nagminyo na kini. Mao gyud ni sagad mahitabo sa babaye ug lalaki nga dili maka-eskuyla bation og kalaay ug makahunahuna lang og minyo.

Ang nahitabo kang Carmi wala hinuon makaguba sa mga plano ni Angeline. May lain pa siyang mga manghod nga nagkinahanglan sa iyang panabang.

Gipakigkitaan gyud ni Angeline si Carmi. Gusto niyang makita ang kahimtang niini.

“Pasayloa ko, Ate,” nagkanayon si Carmi.

“Nganong nangayo ka man og pasaylo?” Pangutana ni Angeline.

“Tungod kay nagminyo ko nga wala sa saktong panahon.”

“Wala ka makasala niana. Ang angay mong buhaton karon mao nga magplano ka ug ang imong bana alang sa inyong kaugmaon.”

Pagkataudtaod, nahiabot si Regner, ang bana ni Carmi. Gikan pa kining mitanda sa basakan nga gihasi sa dangan. Gipaila ni Carmi si Regner ngadto kang Angeline.

Nag-estorya silang tulo. Paglabay sa pipila ka gutlo nananghid si Angeline nga mopauli apan mipasalig siya nga motabang sa kasal nila ni Carmi ug Regner. -- Sumpayan pa