Man Hater - Gula 88

“Kun maoy imong gusto, Salie,” ni Allan pa, “ikaw ang matuman. Ug ayaw kabalaka nga magbaton ako’g kasilag kang Inspector Cuyos. Dili kana mahitabo.”

Gitutokan ni Salie si Allan. Iyang gibasa diha sa nawong sa ulitawo kun matinud-anon ba kini sa gisulti niini.

“Daghang salamat, Allan,” ni Salie pa nga gibati’g tumang kahinangop, “nga nakasabot ka.”

Pagkilab sa pipila ka daklit, gipadagan na ni Salie ang awto. Mipadayon sila ngadto sa city hall aron pagpakigkita sa mayor. Nahuwasan na siya sa kabalaka.

Madasigon si Mayor Aldrin de Gracia nga nakig-atubang nilang Salie Valle ug Allan Delfino sa buhatan niini sulod sa city hall. Gi-interview kini ni Salie. Gikuhaan usab ni Allan og hulagway ang mayor samtang gisukitsukit kini sa dalagang reporter.

Human sa interview nagpasalamat sila si Salie ug Allan sa mayor tungod sa paghatag niini’g panahon kanila. Nasayod sila nga busy ang mayor sa daghang bulohaton. Igo lang mipahiyom ang mayor ug mipasalig nga andam gihapon kini sa pag-atubang kanila sa sunod nga higayon.

Namalik gihapon sila si Salie ug Allan sa buhatan sa Moon-Star Daily. Misantop sa hunahuna ni Salie nga sulaton gilayon niya ang iyang report. Mahimo man unta nga adto niya kini sulaton sa balay apan gusto niya nga makagula na kini sa isyu sa ilang mantalaan ugmang adlawa. Nabanabana niya nga mahuman pa niya pagsulat ang iyang balita sa dili pa mohapon.

“I-develop gilayon kanang nakuha mong mga hulagway aron atong magamit,” giingnan niya si Allan sa pag-abot nila sa opisina.

Misanong ang ulitawo. Midiretso kini sa photo section aron pag-develop sa mga hulagway nga nakuha niini. -- Sumpayan pa