“Hain man diay sila si Christian ug Carmi?” Nangutana si Angeline dihang iyang namatikdan nga wala ang duha niya ka igsuon.
“Si Christian nanarbaho sa lungsod,” tubag sa iyang amahan. “Usa ka negosyanti’g bugas ang iyang amo.”
“Ug si Carmi mitipon na sa iyang bana,” misagbat ang iyang inahan.
“Unsay bana?” Nakugang si Angeline sa iyang nadungog.
“Mabdos nag duha ka buwan ang imong manghod,” mipasabot ang iyang amahan. “Among gipatawag ang lalaki nga maoy nakaingon sa iyang kahimtang. Mipasalig man nga mangasawa. Maong gitakda ang ilang kasal sa sunod buwan ug si Carmi mitipon na lang sa lalaki.”
“Anugon,” nakaingon si Angeline.
Daghan man gud unta og plano si Angeline alang sa iyang mga manghod. Kun makatapos na unya siya sa iyang pagtuon sa kolehiyo. Paningkamotan niyang makatrabaho aron makatabang siya sa iyang mga igsuon. Gusto siyang makapadayon pud sa pagtungha sa kolehiyo ang iyang mga igsuon. -- Sumpayan pa