Man Hater

Gula 87

Nianang pagka-ala una sa hapon, nagkuyog sa pagpanglakaw sila si Allan ug Salie aron pagpangalap og lab-as nga mga balita alang sa Moon-Star Daily. Sila gayod ang kanunay nga mag-uban sanglit ang ulitawo man maoy iyang photographer.

Sama sa naandan, ang awto ni Salie maoy ilang gisakyan. Gipangunayan kini sa pagmaneho sa dalaga. Wala’y tingogtingog si Allan nga naglingkod sa iyang tupad.

Paingon sila sa City Hall. Maoy nahunahunaan ni Salie nga iyang pakigkitaan ang mayor sa dakbayan sa Sugbo. Iya kining interbiyuhon.

Pag-abot nila sa Plaza Independencia, gipahunong ni Salie ang awto. Aduna siya’y nahunahunaan.

“Magsulti una kita’g maayo, Allan,” mihagad si Salie sa ulitawo nga wala gihapoy timik sa gilingkoran niini.

“Unsay atong panagsultihan?” ni Allan nga wala motan-aw kaniya.

“Hangyoon ko ikaw nga unta sabton mo ang akong kahimtang,” ni Salie pa. Gituyo niya ang pagbugnaw sa iyang tingog aron paglukmay sa balatian sa ulitawo.

“Unsay buot mong ipasabot?” ni Allan.

“Wala sa akong hunahuna ang gugma-gugma,” ni Salie pa. “Hangyoon ko ikaw nga ayaw una ako samoka mahitungod niini sa pagkakaron. Wala pa ako makadawat sa nahitabo sa akong inahan ug igsuon. Lab-as pa kini hangtod karon sa akong panumdoman.”

Wala motingog si Allan.

“Ug hinaot usab unta,” mipadayon si Salie, “nga dili ka magbaton og kasilag kang Inspector Cuyos kay wa siya’y labot sa akong kinabuhi.”

Wala gihapon motingog si Allan.

“Mahimo ba kining gihangyo ko kanimo, Allan?” misukna si Salie pagkataudtaod. -- Sumpayan pa