Sugat - Gula 3

Wala na tubaga ni Pedro ang text message ni Merlyn. Nagool siya kay nalantawan niya ang panghitabo sa ilang panagkita nga biyaan ra siya ug yam-iran ni Merlyn nga kanhi niya girlfriend.

Taud-taud, nagpusot-pusot ang duha ka text message ni Merlyn nga nadawat sa selpon ni Pedro. “Peds wala ka na man motubag?” ang ikaduha nga message, “Nasuko ka nako?”

Naghuna-huna si Pedro unsaon pagtubag si Merlyn. “Dili tingali maayo Mer nga dili nimo tagdon kun imong ikakita ang kanhi mo boyfriend,” tubag ni Pedro sa taud-taud na nga text ni Merlyn.

“Depende kun may pinagsamahan kami nga dili makalimtan,” ni Merlyn pa. Wala na molahutay og pakigteksanay si Pedro kang Merlyn. Ingon siya sa gibati og kaluya kay nahuna-huna man niya nga ma-basted siya sa ilang panagkita.

“Good night Mer,” ni Pedro pa. “Good nayt too,” reply ni Merlyn.

Mihigda si Pedro sa iyang higdaanan. Gusto niya nga makalimtan usa si Merlyn. Apan napakyas si Pedro kay mikuliot man g’yud sa iyang kaisipan kadtong malipayon nila nga panag-uban dihang maayo pa ang ilang relasyon kaniadto.

Wala g’yud siya magmahay sa ilang panag-uban. Maayo usab kaayo si Merlyn nga midala sa iyang papel isip girlfriend. Ang nakadaut sa ilang relasyon mao ra gayud si Joy nga mas batan-on kay kang Merlyn ug matintalon kaayo kang Pedro.

Sa taud-taud nga paghandum ni Pedro kang Merlyn, ingon sa gusto na niya nga moabut dayon ang Sugat kay aron iya na kini nga ikakita pag-usab.

Gipiyong pag-ayo ni Pedro ang iyang mga mata ug takulahaw lang nga gidagit sa katulogon ang iyang halawom nga paghanduraw sa kanhi niya girlfriend.

Miabot ang Huwebes ug Biyernes Santo. Nagteksanay gihapon sila si Merlyn ug Pedro. “Naghinam-hinam g’yud ko sa ato unya nga panagkita Peds,” matud ni Merlyn. “Ako ‘sab Mer, apan basin baya og imo lang ko nga biyaan ha?” ni Pedro pa nga ingon sa may kabalaka.

“Nganong biyaan ta man ka?” ni Merlyn pa. Gi-reply ni Pedro ang text ni Merlyn. Duna siya’y nahuna-hunaan bahala na’g masuko kaniya ang kanhi niya girlfriend nga wala makaila sa tinuoray niyang pagkatawo.

“Ayaw’g suko ha? Karon pa lang pahibaw-on tika Mer nga I love you. Usbon nako ni og litok sa atong panagkita karong Domingo sa kaadlawon,” matud ni Pedro sa iyang text. (Sumpayan)