Unom kabuok

Dear Tita Salie,

Hello and how are you? I just hope that you are in good health always. Just call me Fiona, am still single and I have boyfriends.

Duna ko’y unom kabuok uyab, Tita. Bisan kun daghan sila apan mahal kaayo nako silang tanan. Matud usab nila nga nahigugma gyud sila nako sa tinuoray. Ato nalang silang panganlan aron imong masabtan ang tanan. Sila si Jefmon, Joel, Richard, Bert, Maxx ug si Rucel. Pulos sila mga buotan ug kasaligan, ug niining mga hiyas nga anaa kanila dali kaayo ko nga nahigugma kanilang unom. Mao nga naglibog na hinuon ko kun kinsa gyud kanila ang akong pilion.

Nilang unom ka mga lalaki, mas ganahan ko ni Jefmon, Bert ug Richard. Kani gyod silang tulo ang mag-una kun mamili nako nila. 4 years na baya ang among relasyon ug sukad-sukad wala pa gyod mi nag-agi og bulag. As in maayo gyod kaayo silang modala og relasyon. Ug dili gyod nako kaya nga duna mawagtang nila.

Pero nasayod ko, Tita, nga dili puyde nga 3 kabuok ang akong bana. Kinahanglan nga magpili lang gyud ko nila og usa aron maoy akong pamanhon. Apan naglibog gyud ko, Tita, ug naglisod ko kun kinsay akong pilion. Palihog pasabta ko. Daghang salamat. God bless and more power.

-- Fiona

* * *

Hello, Fiona,

Naunsa man pud intawon ka iha, kadaghan man pud sa imong gikolekta. Ug dili kay nangolekta ka lang imo pa gyod silang gihigugma. Akoy naglisod naghunahuna sa imong kahimtang. Kun ikaw nalingaw sa imong gibuhat ako naglisod kun makalihok ka pa ba nianang sitwasyona. Lisod na man gani nga i-handle ang duha ka hinigugma, unya unom pa gyod ang imoha. Wala ka ba mahadlok nga mahibaw-an nila o kaha mahibaw-an sa laing tawo o wala kay paki-alam?

Dili gyud kini maayo, Fiona, kay kun masayran kini sa uban mobati gyod ang image sa imong pagkatawo. Mahimo kang cheap ngadto sa ubang tawo. Kun cheap ka na sa ilang pagtan-aw nimo yanoyanohon ka nalang ug dili na ka irespeto. Respetohan ang imong kaugalingon aron usab respetohan ka sa uban.

Hunahunaa kun kinsa gyod kanila ang mas ikasinabot nimo og tinuod nga imong gihigugma ug nahigugma usab kanimo sa tinuoray ug siya ang pilia. Kun makapili ka nag usa kanila piyonga na ang imong mga mata ug ayaw na sila tan-awa ug hunahunaa aron dili ka maglisod sa paghikalimot kanila. Buhata kini aron monindot ang dagan sa imong kinabuhi.

-- Tita Salie