Mata sa Kasingkasing - Gula 90

“Erik, di na kinahanglang mag-agad ka sa akong desisyon mahitungod nianang butanga. Di na kinahanglang mananghid ka pa nako. Personal mo na kanang kinabuhi. Di na ko angay manginlabot niana.”

“Pero ikaw ang hinungdan kun nganong pangulitawhan nako si Almina.”

Mikunot ang agtang ni Angeline. Naglibog siya sa iyang nadungog.

Gitutokan ni Angeline si Erik. Gusto niyang tugkaron ang logic sa gisulti sa ulitawo kaniya.

“Di ko gustong magdako ang away ninyo ni Almina, Angeline,” mipasabot si Erik. “Di ko gustong masubli pa ang pagpasakit niya nimo.”

“:U-unsa?”

“Mao kana, Angeline. Maong nakadesisyon kong tinud-on na lang gyud ang pagpanguyab niya aron magmalinawon na siya.”

“Aw, ikaw ang mag-igo, Erik. Nahigugma ka man sab kaha niya?”

“Wa ko’y pagbati bisan gamay na lang alang kaniya. Siya ray dako’g gusto nako. Siya ray nagtinguha nga magkarelasyon kami. Gani, nag-una-una na man siya’g panabi nga may relasyon kami bisan wa pa ko manguyab niya. Ambot kun unsang klaseha sa bakukang ang misulod sa iyang utok?” -- Sumpayan pa