Singsing

Dear Tita Salie,

Have a good day to you. I am an avid fan of your column. Mao gyod kini ang molingaw kanako, Tita, sa sayong kabuntagon. Ganahan kaayo ko mobasa sa imong mga tambag kay undanon kaayo. Mao nga ganahan pod ko magpatambag nimo.

Tawga lang ko sa pangalan nga Kent, usa ka ulitawo. Ang akong problema kabahin kini sa gugma. Kini man gong akong uyab dunay 1 ka anak apan buwag na sila sa amahan sa bata.

Usa ka higayon sa among panag-estoryahanay ako siyang gipangutana kun makigbalik pa ba siya sa amahan sa iyang anak kun ugaling gusto kining makigbalik kaniya. Matud sa iyang tubag nga dili na kuno niya dawaton ang amahan sa iyang anak kay ingon niya nga ako na kuno ang iyang gihigugma.

Ang akong uyab dunay gisul-ob nga singsing nga hinatag sa amahan sa iyang anak. Busa ako siyang giingnan nga kun ako na ang imong gihigugma tangtanga na ang maong singsing kay wala na man kaha siya sa imong dughan. Apan dili man gyod niya tangtangon ang maong singsing, Tita. Bisan unsaon nako’g sulti dili gyod niya huboon. Unsa may buot ipasabot niini, Tita, love pa kaha niya ang tag-iya sa singsing hinungdan nga dili niya kini kayang tangtangon? Mao gyud kini ang nakapaduhaduha sa akong gugma kaniya. Unsay akong buhaton? Palihog pasabta ko. Thank you very much and God bless. -- Kent

* * *

Hi, Kent,

 Ang wedding ring simbolo lamang kani sa kaminyoon. Buot ipasabot nga ang tawong minyo bisan nagsul-ob pa siya og wedding ring walay assurance nga dili siya mangita’g lain. Kay adunay daghang minyo, labi na ang mga lalaki nga bisan og dagko ug mahalon pa ang wedding ring apan sige og diskarte o panguyab ngadto sa laing babaye. Walay mahimo ang wedding ring aron pugngan nga dili manguyab ang nagsul-ob niini. Ang wedding ring magpabilin ra gyod siya didto sa finger sa nagsul-ob niini ug igo lamang magpahinumdom nga “hoy minyo na ka ug dili na puyde.”

Ayaw kaayo hatagi og bili ang singsing sa imong uyab nga hinatag sa iyang uyab, basta dili lang kini wedding ring. Meaning wala gyod sila makasal sa amahan sa iyang anak. Kung souviner lang kini walay problema kundili niya tangtangon. Kay tingali kun wala gyod siya’y laing singsing gawas niini. Pasagdi usab siya nga mo-treasure sa sentimental value sa maong butang. Siyempre amahan sa iyang anak ang tag-iya niini.

Let her grow as a matured person. Ayaw siya ipita kay masakal usab siya. Pasagdi siya nga siya mismo ang mohubo sa singsing. Pasagdi siya nga maka-realize nga dili na maayo makadaot kini sa inyong pagminahalay kay ma-insecure ug ma-threaten ka. -- Tita Salie