Man hater

“Hinugay na niana, Yuri,” ni Salie pa. “Kun gusto ka nga magpabilin kitang managhigala, hunonga na kining binuang nga gihimo mo ngari kanako.”

“Salie, wa ko magbinuang,” tugob sa kamatinud-anon ang tingog ni Yuri.

“Igo na, Yuri!” misinghag na gayod si Salie. “Hunonga na kining imong tinunto samtang may nahibilin pa akong respeto sa imong pagkatawo. Ayaw paabota nga mausab ang pag-ila ug pagtan-aw ko kanimo.”

Ug miklik ang awditibo sa pikas tumoy sa telepono. Gibutang na kini ni Salie.

Si Yuri igo lang nakapanglingo. Nabuhian niya ang usa ka lawom nga panghupaw. Gihinay niya pagbutang ang awditibo nga iyang gigunitan. Misandig siya sa sandiganan sa swivel chair. Mibati siya’g hilabihan nga kahisagmuyo.

Wala siya masayod kun unsay angay niyang buhaton aron motuo ug mosalig na si Salie kaniya. Naglibog siya. Namatikdan niya nga ingon sa wala’y pagkatarog ang baroganan ni Salie. Wala kini malukmay sa iyang pagpasabot.

Udto. Ang mga empleyado sa Sunlight Publishing naniudto sa kantina sa kompaniya. Apan si Salie wala mukaon. Nagpabilin siya sa sulod sa buhatan. Wala siya ganahing mikaon. Naglagot siya. Misugmat ang iyang sapot tungod sa pagtawag ni Yuri sa telepono kaganinang buntag.

Dili niya tuyoon apan maglagot gayod siya sa lalaki nga maghisgot og gugma kaniya. Mahinumdom gilayon siya sa nahitabo sa iyang inahan ug igsuon. Kay dili ba nga lalaki man ang nakaingon sa ilang kamatayon? Nasilag siya sa iyang amahan nga nagluib sa ilang inahan. Nasilag usab siya kang Roger Justiniano, ang lalaki nga maoy nakapamabdos kang Suzette nga iyang manghod. Ug nasilag siya sa tanang lalaki sa kalibotan! -- Sumpayan pa