Ang Bayani

Gula 4

Dul-an sa usa ka kilometro gikan sa balay nila ni Liza paingon sa dapit nga gihimoan sa kalingawan. Pagka-gabii, nagkuyog sila si Mindo ug Liza pag-adto sa kalingawan.

“Yuna, mangutana ko nimo Liz,” matud ni Mindo samtang naglakaw silang duha subay niadtong agianan. Milingi si Liza kaniya. “Unsa na Min?”

Wala dayon motubag si Mindo. “Nabalaka lang ko kay didto sa kalingawan basin maestsapwera lang ko kun magtagbo na kamo ug ang imong uyab,” mapanagan-on kaayo si Mindo. Apan abtik nga mitubag si Liza ngadto sa ulitawo. “Wala pa man ko’y uyab apan daghan ang nanguyab.”

Tuod miabot sila  sa dapit nga gihimoan sa kalingawan. Dili pa kaayo daghan ang mga tawo. Napasiga ang mga mata ni Mindo kay kadtong lima ka bugoy nga gikaaway niya kaganinang buntag nga mibugal-bugal ni Liza, didto sa usa ka tindahan.

Nasabot ni Mindo nga nakainom na ang maong mga bugoy ug lanog kaayo sa ilang mga tingog samtang nagsultihanay. Sa atbang sa lima, diha usa’y nanag-inom.

Unya kalit lang madungog nila ang paka sa buak nga mga botelya. Gilambos diay niadtong dakuon nga bugoy ang baseyo nga botelya sa grande paingon ngadto sa pundok sa laing mga batan-on.

Nagubot ang wala pa gani kasugdi nga kalingawan. “Hain man diay ang nagdumala sa kalingawan Liz nga wala man nila badlonga kanang mga tawhana?” nakapangutana si Mindo.

“Walay magpaalig-alig og badlong ana nila kay kanang dakuon og lawas makadaghan na kana mapriso. Maghuwat ra g’yud na sila nga moabut ang amahan niana ug maoy mobadlong,” ni Liza pa.

Nakahukom si Mindo nga duolon ang lima ka tawo nga iyang gikasangka kaganinang buntag. Gisuwayan unta og gunit ni Liza ang bukton ni Mindo, apan gihangyo sa ulitawo si Liza nga dili siya pugngan aron magmalinawon ang kalingawan.

“Brod… nakatimaan ba kamo nako? Palihug dia ta dinhi aron maglingaw-lingaw, dili nato gubton ang kalingawan brod,” matud ni Mindo nga mibarug atubangan sa lima. Miyanghag ang tawo nga lider-lider sa mga bugoy.

Nagtoo si Mindo nga mahitabo na usab kumbati tali kanila. Apan ang may pagka hubog na nga lider sa grupo miyukbo kang Mindo. “Sir walay problema, saludo mi nimo sir. Mag-inom ra mi diri ug ang akong mga barkada.”

Gipanglamano og tagsa-tagsa ni Mindo ang lima ka tawo nga parehong nangaligdas sa ilang away kaganina. (Sumpayan)