Ang Bayani

Gula 2

 Giigmat ni Mindo ang iyang mga mata ug giandam ang kaugalingon kay mitindog ang usa ka lalaki. Apan mihana kini paglakaw apan gipugngan ni Mindo. “Walay mobiya kaninyong lima kun dili bayran ang inyong gikaon!,” may kapintok sa tingog ni Mindo.

“Kinsa ka nga momandar namo? Gusto ka’g bun-og?” mitingog kadtong lalaki nga dakuon og lawas nga maoy nagsigi og agbay-agbay sa tindera kaganina.

Gilig-on ni Mindo ang iyang kaugalingon. “Basta bauran ko kamo nga walay mobiya aron dili kita magkagubot.” Dungan nga nanindog ang laing upat ka lalaki ug ang duha mipahimutang sa iyang luyo.

Gisab-it ni Mindo ang iyang baya sa putol nga sanga sa kahoy nga gihimong haligi sa tindahan ug nangandam. Nabantayan niya nga mihana og patid ang diha sa iyang luyo mao nga napugos si Mindo sa pagpanalipod sa kaugalingon.

Gitabangan si Mindo sa lima ka lalaki. Ang daku’g lawas maoy giatubang ni Mindo apan miatake usab ang upat niini ka kauban. Patid-sukmag ang gihimo ni Mindo ngadto sa lima .

 Dunay iyang nagunitan nga gilambuyog ni Mindo ug maayong pagkasalib-ay sa lingkoranan sa tindahan. Ang usa maayong pagkaigo sa patid sa apapangig ug wala makabangon.

Apan naigo si Mindo sa sukmag sa daku’g lawas. Natay-og ang iyang dughan. Kini maoy nakapasamot sa kaisog ni Mindo. Gigamit niya ang nakat-onan niya gikan kang Sensei Dhong Reynaldo sa Comjukai Aikido.

Hangtud nga parehong nalukapa ang lima . “Bayri ninyo ang inyong nakaon nga prutas aron dili ko kamo tiwasan!” gitudlo niya ang lalaki nga daku’g lawas. Mibangon kini og may gikuot.

“Siguroa nga kwarta ang imong kuoton kay kun armas ang inyong kuoton, kini usab maoy akong gamiton,” matud ni Mindo nga mibunot sa iyang sinaw kaayong kalibre 45 nga giluklok sa hawak.

“Polis ka diay? Mobayad mi ug sori lang kaayo,” matud sa lalaki nga dakuon og lawas. Human makabayad ang lima ka lalaki sa ilang nakaon, nag-ulhos-ulhos lang kini sa pagpanglakaw.

Mitutok kang Mindo ang tindera. “Salamat kaayo sir nga miabot ka kay ganina ra sila nga nagbugal-bugal nako ug wala g’yuy mitabang kay mga bugoy sila dinhi,” matud sa tindera.

“Ako si Mindo,” dungan sa pagtunol ni Mindo sa iyang kamot sa tindera nga nakapahiyom sa kalipay. “Liza ang akong ngalan Sir.” (Sumpayan)