Taga City Gov't

Dear Tita Salie,

Maayong adlaw. Tawga lang ko og Marilyn, taga Bohol, usa ka minyo apan bulag na sa bana. Adunay ko’y uyab-uyab karon nga anaa nagtrabaho sa City Government.

Taudtaod na mi nga nagbulag sa akong bana ug iyang gibilin diri nako ang among mga anak. Lisod gyud kaayo ang akong kinabuhi, Tita, kay wala man koy trabaho. Unya wala pa gyud mosuporta ang akong bana sa among mga anak. Iya lang ko nga gipasagdan sa tanan nga gastohan.

Karon duna ko’y nauyab nga lalaki. Bisan sa akong kasinatian sa kinabuhi iya lang gihapon ko nga gimahal. Apan abi nako og maluag-luagan ko sa akong kahimtang sa akong pagpakigrelasyon niining lalakiha, nisamot man hinuon og kalisod ang akong kinabuhi, kay seloso man siya kaayo. Dili siya mosugot nga molakaw ko nga ako lang usa. Mo-absent gyud siya sa trabaho aron iya kong kuyogan kun duna ko’y lakaw.

Dili siya mosugot nga mangaplay ko og trabaho kay tingali kuno kun makauyab ko. Unsaon na man lang nako ini nga duna ra ba ko’y mga anak ug wala baya maghatagan og kuwarta ang akong bana. Palihog pasabta ko. Tita. Daghang salamat sa pagtagad.

* * *

Dear Marilyn,

Kun naglisod kanang daan sa kinabuhi kay gibiyaan ka sa imong bana ayaw na kini dungagi pa pinaagi sa pagpakigrelasyon sa tawo nga sobra ka seloso. Imong hunahunaon kun unsay imong palabihon, ang imo bang gugma nianang maong lalaki. Pero ayaw pagsalig sa laing tawo kay unya’g buhaton sad niya ang gibuhat sa imong bana, luoy na kaayo ka ug luoy pud kaayo ang imong mga anak.

Pasabta og maayo kanang taga City Government nga imong uyab kabahin sa imong sitwasyon. Sultihi siya kun unsay imong ipakaon sa imong mga anak kun dili ka mogawas sa balay ug mangita og kuwarta. Pangutan-a siya kun unsay kaugmaon sa imong mga anak kun imo lang silang pasagdan tungod sa imong gugma kaniya.

Kun dili gyud siya kasabot sa inyong sitwasyon ug padayon ang iyang pagkaseloso, og dili ka niya tugotan nga mangita og trabaho ug wala siya’y plano nga tabangan ka sa imong problema palayo na lang nianang lalakiha kay tingali og pareha sila’g tinai sa imong bana. Padayon sa imong pagpaningkamot ug paabota nga moabot ra gihapon ang suwerte ug grasya alang kanimo ug sa tawo nga wala kawad-i og paglaom. -- Tita Salie