Gula 7
Nag-ilis sila si Dorinda ug Ben. Gipunit ni Ben ang intercom nga diha sa lamesita ug gikontak ang counter sa motel. “Bill palihug kay mo-check-out na mi.”
Dihang nakailis na si Dorinda, gitutokan kini pag-ayo ni Ben. Mora’g nagtubod ang laway ni Ben nga nagsud-ong sa dalaga. Gigakus kini ni Ben ug giukoban ang mga ngabil.
May nanuktok sa pultahan. Gitunol ni Ben ang bayad agi sa gamay’ng lungag sa may pultahan. Taud-taud nanaug na sila ug misakay sa motor. Pag-andar sa motor, gibuksan sa roomboy ang pultahan sa grahe sa motel.
Kusug ang pagpadagan ni Ben sa motorsiklo. Pag-abot nila sa gamay’ng karsada paingon sa balay nila ni Dorinda, nakita nila nga hayag pa ang balay. “Hala wala pa lagi matulog sila si Nanay,” sa dalaga pa.
Nadungog nila nga may nagsultihanay sa sulod. Pagbukas ni Dorinda sa pultahan, napasiga ang iyang mga mata kay duha ka lalaki ang didto naglingkod sa sulod. Usa sa duha ka lalaki mao si Kelly, ang amahan sa iyang anak.
Kalit lang namingaw. Walay usa kanila nga nakaluwat og mga pulong. “Saka mo sir Ben,” sa Nanay pa ni Dorinda.
“Dia ka man lagi Kelly… unsay ato nimo?” giingnan ni Dorinda ang lalaki. Nakasabot si Ben nga dili maayo ang sitwasyon. “Dorin, mobiya na lang ko kay basin duna mo’y importante nga panagsultihan,” ni Ben pa.
“Ayaw pagbiya Ben. Siya diay si Kelly ang amahan ni Inday. Apan wala na mi relasyon human sa dul-an sa tulo ka tuig na nga iya ko nga gibiyaan,” matud ni Dorinda.
Nangayo’g pasaylo si Kelly. Nagbuwag na diay kuno sila ug sa babaye nga iyang gikapuyo. Igo lang miyamiid si Dorinda.
Taud-taud migawas sa kwarto ang anak ni Dorinda. “Uy, wala ka pa diay matulog anak?” ni Dorinda pa. “Kaganina ra kana nga wala mogawas. Wala g’yud moduol nga gihangop unta ni Kelly,” matud sa inahan ni Dorinda.
“Tito diin diay mo Mama nako? Maypa ikaw akong Papa, Tito Ben” matud sa bata nga mibai-id kang Ben. Miduko si Kelly nga wala makatutok sa iyang anak nga wala motagad kaniya. “Dihang naospital kini si Inday, wala g’yud ko’y kwarta nga ikapalit sa iyang tambal. Kini si Ben maoy nakaluwas nako. Ikaw nga amahan ambot og diin ka ra atul sa maong higayon sa akong panginahanglan,” gitulisok ni Dorinda si Kelly.
Gikugos ni Ben ang anak ni Dorinda. “Pasayloa ko Dorinda. Lauman nako nga magmalipayon kamo niining radio reporter. Sir, pangga-a si Dorinda ug ang among anak bugti sa akong wala mahimo kanila. (Kataposan)